Финляндияда мухлислар клуб стадионини ёқиб юборди (видео)

Финляндиядаги тарихий “Ҳака” футбол клуби стадионининг трибунаси уч нафар ўсмир томонидан қасддан ёқиб юборди. Бу воқеа Финляндиянинг энг қадимги футбол стадионларидан бирида содир бўлиб, бутун дунё мухлисларини ҳайратда қолдирди. Бу ҳақда “News9” нашри хабар берди.

Манбага кўра, воқеа жорий йилнинг 7 декабрь куни клуб мамлакатнинг олий лигасидан тушиб кетганидан бир неча ҳафта ўтиб содир бўлган. Оқибатда “Теҳтаан Кентта” стадионининг 400 ўринли ёғоч трибунаси ёнғинда жиддий зарар кўрган.

Маҳаллий полиция терговига кўра, ёнғин пайтида уч нафар вояга етмаган бола воқеа жойида бўлган ва уларнинг барчаси 15 ёшдан кичик. Улардан бири ёнғинни бошлаганини тан олган, аммо Финляндия қонунчилигига кўра, вояга етмаганларни жиноий жавобгарликка тортиш мумкин эмас.

Детектив инспектор Маижастиина Таммисто баёнотида иш тергов остида эканлигини тасдиқлаган. У шунингдек, вояга етмаганлар учун ҳуқуқий оқибатлар турлича бўлиши мумкинлигини, бироқ Финляндияда болаларга компенсация мажбурияти ҳали ҳам қўлланилиши мумкинлигини айтган. 

“Ҳака” клуби раиси Марко Лааксоненнинг айтишича, клуб ҳозирча зарар миқдорини аниқламаган, аммо у жиддий бўлиши кутилмоқда. Клуб аллақачон молиявий йўқотишлар ва қуйи лигага тушиб кетишдан азият чекмоқда, ҳодиса эса вазиятни янада оғирлаштирган. 

Ҳозирда “Ҳака” клуби стадионни яна ўйинларга яроқли қилиш учун тайёргарлик ишларини бошлаган.