Eron maxfiy bazasini namoyish qildi (video)

Eron Islom inqilobi qo‘riqchilari korpusi (IIQK – qurolli kuchlarning maxsus bo‘linmasi) yuqori qo‘mondonligi o‘z dengiz kuchlarining maxfiy yerosti bazasini namoyish etdi. Bu haqda “Tasnim” xabar berdi.

“Islom inqilobi qo‘riqchilari korpusi dengiz kuchlarining birinchi yerosti shahri namoyish qilindi. IIQK yuqori qo‘mondonligi vakillari Eron Islom Respublikasining dengizdagi strategik kengayishi va yuqori mudofaa salohiyati haqida ma’lumot berdi. Bu baza mamlakatning dengiz qudratini ko‘rsatish bilan birga, dengiz kuchlari tashkil etilganidan buyon davom etayotgan keng qamrovli sanksiyalar ustidan xalq irodasining g‘alabasi timsolidir”, deyiladi xabarda.

“Tasnim”ning reportajiga ko‘ra, bazani namoyish qilish marosimini IIQKning oliy qo‘mondoni Husayn Salomiy va IIQK dengiz kuchlari qo‘mondoni Alireza Tangsiri o‘tkazgan. Salomiyning so‘zlariga ko‘ra, ushbu baza va unda namoyish qilingan katerlar IIQKning jangovar salohiyatining faqat kichik bir qismi xolos.

Eslatib o‘tamiz, avvalroq Eron Aerokosmik kuchlari qo‘mondoni general Dovud Shayxiyyan mamlakatda ishlab chiqilgan yangi raketaga qarshi mudofaa tizimini sinovdan o‘tkazish va keyinchalik ishga tushirishga tayyorgarlik ko‘rilayotganini ma’lum qilgan edi. Uning so‘zlariga ko‘ra, ushbu hodisa mintaqadagi harbiy-siyosiy vaziyatni sezilarli darajada o‘zgartiradi va agressiv davlatlar tahdidlarini idrok etishga ta’sir qiladi.