Eri tomonidan vahshiylarcha kaltaklangan ayol vafot etdi

Avvalroq, Toshkent viloyati Oqqo‘rg‘on tumanida 23 yoshli kelin ovsini, qaynonasi va eri tomonidan vahshiylarcha kaltaklanishi oqibatida komaga tushib qolgani xabar qilingan edi. Bugun, 24 yanvar kuni ayol olgan tan jarohatlari oqibatida vafot etdi. Bu haqda viloyat Ichki ishlar bosh boshqarmasi matbuot kotibi Bobur To‘laganov ma’lum qildi.

“Afsuski, 23 yoshli ayol ko‘rsatilgan tibbiy muolajalarga qaramay bugun shifoxonada vafot etdi. Toshkent viloyati Ichki ishlar bosh boshqarmasi marhumning yaqinlariga chuqur ta’ziya va hamdardlik bildiradi”, deyiladi xabarda.

Bildirilishicha, mazkur holat jabrlanuvchining o‘limiga olib kelgani sababli qo‘zg‘atilgan jinoyat ishi Jinoyat kodeksining 126¹-moddasi (oilaviy maishiy zo‘ravonlik) 8-qismi “g” bandiga qayta malakalanib, tergov harakatlari davom ettirilmoqda.

Eslatib o‘tamiz, avvalroq Samarqand viloyati Urgut tumanida xotinini bolalarining oldida belkurak bilan urgan erkak 3 yilga qamalgan edi.