Erdo‘g‘an Putin va Zelenskiyni uchrashtirish g‘oyasini NATOga yetkazdi

north_east

“Kelasizmi yo boraymi?” Erdo‘g‘an Putindan javob kutayotganini aytdi

Turkiya Prezidenti Rajab Toyib Erdo‘g‘an Ukraina va Rossiya o‘rtasida yetakchilar darajasida yoki texnik darajadagi uchrashuv o‘tkazishga tayyor. Bu haqda Turkiya Prezidenti idorasi ma’lum qilgan. 

Kecha, 18 fevral kuni Erdo‘g‘an NATO bosh kotibi Yens Stoltenberg bilan respublikaning alyansga qo‘shilganining 70 yilligi munosabati bilan telefon orqali suhbatlashgan.

“Prezident Erdo‘g‘an Turkiyaning ittifoqda birinchi kundan boshlab prinsipial, mas’uliyatli va yo‘naltirilgan pozitsiyaga sodiqligini va buni davom ettirishini ta’kidladi.U Rossiya va Ukraina o‘rtasida davom etayotgan inqiroz NATOga a’zo bo‘lishning qo‘shimcha qiymatini yana bir bor ko‘rsatganini ta’kidladi. Prezident kuchlanish boshlanganidan beri buni diplomatiya yo‘li bilan hal qilish kerakligini aytib, shuningdek, ikki tomon bilan yetakchilar darajasida yoki texnik darajada uchrashuv o‘tkazishga tayyorligini ma’lum qildi”, deyiladi xabarda. 

Erdo‘g‘an, shuningdek, “Turkiya zarur hissa qo‘shishdan va NATO xavfsizligi uchun mas’uliyatni o‘z zimmasiga olishdan bosh tortmaydi”, deb qo‘shimcha qilgan. 

“Prezident yangi Strategik konsepsiyada terrorizm tahdidini uning barcha ko‘rinishlarida qaytarishga ustuvor ahamiyat berilganini ta’kidladi. Turkiya, ayniqsa terrorizmga qarshi kurash kabi sohalarda ittifoqdoshlaridan kerakli yordam va birdamlikni kutishning tabiiy huquqiga ega”, deyilgan xabarda. 

Ma’lumot o‘rnida, joriy yilning 26 yanvar kuni Erdo‘g‘an Rossiya rahbarini mamlakatga tashrif buyurishga taklif qilganini ma’lum qildi. Bundan tashqari, u Rossiya Prezidenti Vladimir Putin va Ukraina Prezidenti Vladimir Zelenskiy o‘rtasida uchrashuv tashkil etish istagini bildirdi. 16 fevral kuni Erdo‘g‘an Turkiyada uch tomonlama sammit o‘tkazish g‘oyasiga munosabatini bilish uchun Putin bilan telefon orqali muloqot qilish istagi borligini ma’lum qildi. 

Rossiya Prezidenti Matbuot kotibi Dmitriy Peskov Moskva va Anqara o‘rtasida Rossiya Federatsiyasi Prezidentining tashrifi bo‘yicha kelishuv borligi, biroq aniq sanalar hali tasdiqlanmagani haqida ma’lum qilgan. Shu bilan birga, Matbuot kotibi Putin va Zelenskiyning Turkiyada uchrashish imkoniyati hali amaliy jihatdan muhokama qilinmaganini ta’kidlagan.