Endryu va Tristan Teytlarning sud ishini Marko Rubio ko‘rishi mumkin

Endryu Teyt va uning ukasi Tristan Teyt Buyuk Britaniyaning ularni zo‘rlash, tajovuz va jinsiy ekspluatatsiya maqsadida odam savdosiga ko‘maklashish ayblovlari bo‘yicha ekstraditsiya qilish talabiga qarshi kurashar ekan, AQSHdagi qamoqdan ozod etilishni so‘rab sudga murojaat qiladi. Bu haqda aka-ukaning advokatlariga tayanib, “Reuters” xabar qildi.

39 yoshli Endryu Teyt va 38 yoshli Tristan Teyt 18 iyul kuni Mayami shahrida hibsga olingan. Buyuk Britaniya Qirollik prokuratura xizmati 19 iyul kuni 2010 yil iyulidan 2017 yil avgustigacha bo‘lgan davrda to‘rt nafar jabrlanuvchiga nisbatan sodir etilgan deb gumon qilinayotgan jinoyatlar yuzasidan aka-ukalarga qarshi yangi ayblovlar qo‘yilganini ma’lum qilgan.

Qayd etilishicha, AQSH va Buyuk Britaniya fuqaroligiga ega bo‘lgan, sobiq kikbokschilar hisoblangan aka-uka Teytlar barcha ayblovlarni rad etmoqda. Ular AQSH sudyasi Buyuk Britaniyaning ekstraditsiya so‘rovini ko‘rib chiqayotgan bir paytda Mayamidagi federal qamoqxonada saqlanmoqda.

Hibsga olinishi ularning huquqiy muammolarida yangi bosqichni boshlab berdi. Aka-ukalar erkaklik va boylik haqidagi qarashlarini targ‘ib qilib, ijtimoiy tarmoqlarda katta auditoriya to‘plagan. Endryu Teyt avvalroq o‘zini misoginist deb ta’riflagan.

Qirollik prokuratura xizmati ma’lumotiga ko‘ra, Endryu va Tristan Teyt avval ham Buyuk Britaniyada uch nafar jabrlanuvchiga oid zo‘rlash va odam savdosi bo‘yicha ayblovlarga duch kelgan. Britaniya sudyasi 2024 yil yanvar oyida ularni hibsga olishga order bergan. Ular mazkur ayblovlar yuzasidan Britaniya sudida hali aybini tan olish yoki rad etish bo‘yicha ko‘rsatma bermagan.

Buyuk Britaniya aka-ukalarni har ikki toifadagi ayblovlar bo‘yicha javobgarlikka tortish uchun ekstraditsiya qilishga intilmoqda.

13 avgust kuni qamoqda saqlash masalasi ko‘rib chiqiladi

Mayami AQSH prokuraturasi prokurorlari sud hujjatlarida AQSH magistrat-sudyasi Loren Luisdan aka-ukalarni qamoqda saqlashni so‘ragan. Ular aka-uka Teytlar qochib ketish xavfi borligi va jamoatchilik uchun xavf tug‘dirishini ta’kidlagan.

Aka-ukalarning advokati Jozef Makbrayd esa ularning qochib ketish ehtimoli yo‘qligini aytgan. Uning ta’kidlashicha, aka-ukalar 2022 yildan beri odam savdosi bo‘yicha tergov ostida bo‘lgan Ruminiyada barcha sud majlislarida qatnashgan.

“Aybsiz insonlar adolatdan qochmaydi. Aybsiz insonlar adolatga yuzlanadi, chunki oxir-oqibat adolat ularni oqlaydi”, degan Makbrayd Mayami federal sudi binosi oldida jurnalistlarga.

Himoya advokati Jaklin Perchekning aytishicha, aka-ukalar 5 avgustga qadar garov evaziga ozod qilish to‘g‘risida iltimosnoma kiritadi. Bu masala bo‘yicha sud eshituvi 13 avgust kuni bo‘lib o‘tadi.

Ekstraditsiya masalasida qarorni Marko Rubio qabul qiladi

Aka-uka Teytlar ekstraditsiya qilish jarayoni bir necha oy davom etishi mumkin. AQSH sudi hujjatlariga ko‘ra, Buyuk Britaniya 16 sentyabrga qadar Davlat departamentiga ekstraditsiya bo‘yicha to‘liq so‘rovnomani taqdim etishi lozim.

Prokurorlarning bildirishicha, Loren Luis yoki ishni ko‘radigan boshqa sudya Britaniya taqdim etgan dalillar aka-ukalar ayblanayotgan jinoyatlarni sodir etganiga ehtimoliy asos mavjudligini ko‘rsatish uchun yetarli yoki yo‘qligini aniqlaydi.

Shundan keyin ularni ekstraditsiya qilish yoki qilmaslik masalasi bo‘yicha yakuniy qarorni AQSH Davlat kotibi Marko Rubio qabul qiladi. Rubio 22 iyul kuni Manilada jurnalistlarga hozircha bu ishga aralashish niyati yo‘qligini bildirgan.

“Hozircha, balki umuman ham, biz bu masalada hech qanday rol o‘ynamaymiz”, degan u.

Eslatib o‘tamiz, avvalroq aka-uka inflyuyenserlar Endryu va Tristan Teyt AQSHda zo‘rlash va odam savdosi ayblovlari bilan hibsga olingandi.