Эндрю ва Тристан Тейтларнинг суд ишини Марко Рубио кўриши мумкин

Эндрю Тейт ва унинг укаси Тристан Тейт Буюк Британиянинг уларни зўрлаш, тажовуз ва жинсий эксплуатация мақсадида одам савдосига кўмаклашиш айбловлари бўйича экстрадиция қилиш талабига қарши курашар экан, АҚШдаги қамоқдан озод этилишни сўраб судга мурожаат қилади. Бу ҳақда ака-уканинг адвокатларига таяниб, “Reuters” хабар қилди.

39 ёшли Эндрю Тейт ва 38 ёшли Тристан Тейт 18 июль куни Майами шаҳрида ҳибсга олинган. Буюк Британия Қироллик прокуратура хизмати 19 июль куни 2010 йил июлидан 2017 йил августигача бўлган даврда тўрт нафар жабрланувчига нисбатан содир этилган деб гумон қилинаётган жиноятлар юзасидан ака-укаларга қарши янги айбловлар қўйилганини маълум қилган.

Қайд этилишича, АҚШ ва Буюк Британия фуқаролигига эга бўлган, собиқ кикбоксчилар ҳисобланган ака-ука Тейтлар барча айбловларни рад этмоқда. Улар АҚШ судьяси Буюк Британиянинг экстрадиция сўровини кўриб чиқаётган бир пайтда Майамидаги федерал қамоқхонада сақланмоқда.

Ҳибсга олиниши уларнинг ҳуқуқий муаммоларида янги босқични бошлаб берди. Ака-укалар эркаклик ва бойлик ҳақидаги қарашларини тарғиб қилиб, ижтимоий тармоқларда катта аудитория тўплаган. Эндрю Тейт аввалроқ ўзини мисогинист деб таърифлаган.

Қироллик прокуратура хизмати маълумотига кўра, Эндрю ва Тристан Тейт аввал ҳам Буюк Британияда уч нафар жабрланувчига оид зўрлаш ва одам савдоси бўйича айбловларга дуч келган. Британия судьяси 2024 йил январь ойида уларни ҳибсга олишга ордер берган. Улар мазкур айбловлар юзасидан Британия судида ҳали айбини тан олиш ёки рад этиш бўйича кўрсатма бермаган.

Буюк Британия ака-укаларни ҳар икки тоифадаги айбловлар бўйича жавобгарликка тортиш учун экстрадиция қилишга интилмоқда.

13 август куни қамоқда сақлаш масаласи кўриб чиқилади

Майами АҚШ прокуратураси прокурорлари суд ҳужжатларида АҚШ магистрат-судьяси Лорен Луисдан ака-укаларни қамоқда сақлашни сўраган. Улар ака-ука Тейтлар қочиб кетиш хавфи борлиги ва жамоатчилик учун хавф туғдиришини таъкидлаган.

Ака-укаларнинг адвокати Жозеф Макбрайд эса уларнинг қочиб кетиш эҳтимоли йўқлигини айтган. Унинг таъкидлашича, ака-укалар 2022 йилдан бери одам савдоси бўйича тергов остида бўлган Руминияда барча суд мажлисларида қатнашган.

“Айбсиз инсонлар адолатдан қочмайди. Айбсиз инсонлар адолатга юзланади, чунки охир-оқибат адолат уларни оқлайди”, деган Макбрайд Майами федерал суди биноси олдида журналистларга.

Ҳимоя адвокати Жаклин Перчекнинг айтишича, ака-укалар 5 августга қадар гаров эвазига озод қилиш тўғрисида илтимоснома киритади. Бу масала бўйича суд эшитуви 13 август куни бўлиб ўтади.

Экстрадиция масаласида қарорни Марко Рубио қабул қилади

Ака-ука Тейтлар экстрадиция қилиш жараёни бир неча ой давом этиши мумкин. АҚШ суди ҳужжатларига кўра, Буюк Британия 16 сентябрга қадар Давлат департаментига экстрадиция бўйича тўлиқ сўровномани тақдим этиши лозим.

Прокурорларнинг билдиришича, Лорен Луис ёки ишни кўрадиган бошқа судья Британия тақдим этган далиллар ака-укалар айбланаётган жиноятларни содир этганига эҳтимолий асос мавжудлигини кўрсатиш учун етарли ёки йўқлигини аниқлайди.

Шундан кейин уларни экстрадиция қилиш ёки қилмаслик масаласи бўйича якуний қарорни АҚШ Давлат котиби Марко Рубио қабул қилади. Рубио 22 июль куни Манилада журналистларга ҳозирча бу ишга аралашиш нияти йўқлигини билдирган.

“Ҳозирча, балки умуман ҳам, биз бу масалада ҳеч қандай роль ўйнамаймиз”, деган у.

Эслатиб ўтамиз, аввалроқ ака-ука инфлюенсерлар Эндрю ва Тристан Тейт АҚШда зўрлаш ва одам савдоси айбловлари билан ҳибсга олинганди.