Ака-ука Тейтлар ҳибсга олинди (видео)

Кеча, 18 июль куни ака-ука инфлюенсерлар Эндрю ва Тристан Тейт АҚШда зўрлаш ва одам савдоси айбловлари билан ҳибсга олинди. Бу ҳақда Буюк Британия Қироллик прокуратураси хабар берди.

Қироллик прокуратурасининг пресс-релизида ёзилишича, Эндрю Тейтга нисбатан 32 та янги банд бўйича айблов эълон қилинган. Улар орасида еттита банд бўйича зўрлаш, учтадан банд бўйича жинсий эксплуатация мақсадида одам савдосини ташкил этиш ёки унга кўмаклашиш ҳамда баданга шикаст етказиш, шунингдек, боланинг уятсиз тасвирлари ва экстремал порнография билан боғлиқ бўлган 19 та қўшимча айбловлар мавжуд. 

Тристан Тейтга эса битта банд бўйича жинсий зўравонлик, иккита банд бўйича зўрлаш ва учта банд бўйича жинсий эксплуатация мақсадида одам савдосини ташкил этиш ёки унга кўмаклашиш айбловлари қўйилган.

Прокуратуранинг аниқлик киритишича, ушбу жиноятларнинг барчаси 2010 йилдан 2017 йилгача бўлган даврда содир этилган. Бундан аввал ака-ука Тейтларга нисбатан жиноий иш доирасида 21 та банд бўйича айблов эълон қилинган эди. 

“The New York Post” нашрининг хабар беришича, АҚШ Маршаллар хизмати ака-ука Тейтларни Майамидаги Жеймс Л. Найт номидаги спорт мажмуаси яқинида қўлга олган. Эндрю Тейт у ерда қўлқопсиз жанг бўйича турнир ўтказиши керак эди.

Эндрю Тейт кикбоксинг бўйича тўрт карра жаҳон чемпиони сифатида танилган. Спортдаги фаолиятини якунлагач, у вебкам-студиялар тармоғига асос солган. Тристан Тейт эса кикбоксинг бўйича икки карра Европа чемпиони ҳисобланади. Улар кенг оммага “аёлларга нафрат кўзи билан қаровчи блогерлар” сифатида машҳур бўлган. 2024 йилда уларга нисбатан Руминияда ҳам жиноий айбловлар илгари сурилган.

Эслатиб ўтамиз, аввалроқ жинсий зўраваонликда айбланаётган Эндрю Тейт Ўзбекистонга келгани ва тантанали кутиб олингани ҳақида хабар берилган эди.