Eldor Shomurodov “Roma”ni tark etishga yaqin turibdi

O‘zbekiston milliy terma jamoasi va “Roma” klubi hujumchisi Eldor Shomurodov faoliyatini “Venetsiya”da davom ettirishi mumkin. Bu haqda “La Gazzetta dello Sport” nashri xabar berdi.

Manbaga ko‘ra, “Venetsiya” Rim klubidan Shomurodovni ijaraga olishga yaqin turibdi. Eusebio Di Frenchesko boshchiligidagi klub futbolchi uchun raqobatda “Empoli”dan ustun keldi va 29 yoshli hujumchini sotib olish huquqi bilan mavsum so‘ngiga qadar ijaraga olmoqda.

Ma’lumot o‘rnida, Eldor Shomurodov joriy mavsum “Roma” tarkibida 15 o‘yinda maydonga tushib, 2 ta gol urdi va 1 ta assist qayd etdi. 29 yoshli futbolchi rimliklar safiga 2021 yilda kelib qo‘shilgan va amaldagi shartnomasi 2026 yilga qadar mo‘ljallangan. Shomurodovning narxi “Transfermarkt” portalida 4 million yevroga baholangan.

Eslatib o‘tamiz, avvalroq, Eldor Shomurodov ijara asosida “Empoli”ga o‘tishi mumkinligi haqida xabar berilgan edi.