Ederson “Man Siti”dan ketmoqchi

“Manchester Siti” darvozaboni Ederson Morayes kelasi yozgi transfer oynasida jamoani tark etishi mumkin. Bu haqda futbol jurnalisti Fabritsio Romano xabar berdi.

Manbaga ko‘ra, braziliyalik posbon yaxshi taklif tushsa, “shaharliklar” bilan xayrlashishga tayyor. Ayni damda Edersonga Saudiya Arabistoni klublari qiziqish bildirmoqda.

Ederson “Manchester Siti”ga 2017 yilning iyulida “Benfika”dan kelib qo‘shilgandi. O‘shanda uning transfer summasi 40 million yevroni tashkil qildi, futbolchining klub bilan shartnomasi 2026 yilning yoziga qadar mo‘ljallangan. “Transfermarkt” darvozabonni 40 million yevroga baholamoqda.

Joriy mavsumda Ederson 43 ta o‘yinda maydonga tushdi, shulardan 16 tasida o‘z darvozasi daxlsizligini saqlab qoldi, qolgan bahslarda esa 34 ta gol o‘tkazib yubordi.

Ederson “Manchester Siti” bilan birgalikda 2023/2024 yilgi mavsumda Angliya chempioniga aylandi.