Dunyodagi eng xunuk it Golivudda rol o‘ynadi

“Dunyodagi eng xunuk it 2023” ko‘rik tanlovi g‘olibi bo‘lgan it Gollivudning mashxur yulduzlari Rayan Reynolds va Xyu Jekman bilan bir kinoda suratga tushdi. Bu haqda “Super” nashri xabar berdi.

Qayd etilishicha, Mops va xitoy kokildor zotiga oid it – Peggi 2023 yilda “Eng xunuk it”lardan biri deb topilgan. Shu badbasharaligi evaziga Britaniyada mashhur bo‘lib ketgan Peggi Gollivuddagilar e’tiboriga ham tushib, yilning eng kassabop filmida suratga tushdi.

“Dedpul va Rosomaxa” filmida u bosh qahramonning iti – Dogpul rolini ijro etgan.

Kuchuk egasi jurnalistlarga uy hayvonining shon-shuhratidan faxrlanayotganini bildirdi.

“Menga yoqdi. Film davomida Peggi o‘zini juda erkin tutdi, balki Rayan Reynoldsning quchog‘ida o‘zini qulay his qilgandir. Ular mening kuchugimga juda yaxshi munosabatda bo‘ldi. Men har soniyadan zavqlanardim”, deydi u.

Eslatib o‘tamiz, avvalroq AQSHda “Dunyoning eng xunuk itlari” tanlovining 2024 yilgi mavsumi bo‘lib o‘tgandi. Unda  birinchi o‘rinni Xitoyning Pekin shahrida tug‘ilgan “Wild Thang” laqabli it egallagandi.