Dog‘istondagi portlashda 4 nafar O‘zbekiston fuqarosi halok bo‘ldi

Joriy yilning 14 avgust kuni Dog‘iston poytaxti Maxachqal’ada sodir bo‘lgan kuchli portlash oqibatida to‘rt nafar O‘zbekiston fuqarosi halok bo‘ldi. Bu haqda Dog‘iston rahbari matbuot xizmati bergan ma’lumotga tayanib, TASS agentligi xabar berdi. 

Aytilishicha, Dog‘iston rahbari Sergey Melikov Maxachqal’a chekkasida joylashgan yoqilg‘i quyish shoxobchasidagi portlashdan so‘ng yig‘ilish o‘tkazgan. U yig‘ilish davomida portlash oqibatida halok bo‘lgan xorijliklar haqida to‘xtalib o‘tgan.

"Dastlabki ma’lumotlarga ko‘ra, Maxachqal’a chekkasida sodir bo‘lgan portlash oqibatida to‘rt nafar O‘zbekiston fuqarosi halok bo‘lgan. Ularning oilasiga 1 million rubl miqdorida yordam ko‘rsatiladi", deyiladi Dog‘iston rahbari matbuot xizmati xabarida.

Shuningdek, xabarda fojiadan bir necha kun o‘tib Dog‘iston jamg‘armalari halok bo‘lganlar va jarohatlanganlarning oilalariga yordam ko‘rsatish uchun 100 million rubldan ortiq mablag‘ to‘plagani ta’kidlangan.

Bundan oldin “Mash” Telegram-kanali portlash oqibatida bir nafar O‘zbekiston fuqarosi ham halok bo‘lgani haqida ma’lum qilgan edi. Xabarda u 1990 yilda tug‘ilgan N.R. ekani aytilgan.

O‘zbekistonda hozircha bu haqda tegishli tashkilotlar tomonidan ma’lumot berilgani yo‘q.

Eslatib o‘tamiz, 14 avgust kuni Dog‘iston poytaxti Maxachqal’ada dastlab avtoservis binosi yonib ketgan, keyin olov yoqilg‘i quyish shoxobchasiga o‘tgan va kuchli portlash yuz bergan. Portlashdan deyarli 4 soat o‘tib, yong‘in o‘chirilgan.

Dastlab portlash oqibatida 27 kishi halok bo‘lgani haqida xabar bergandik, biroq so‘nggi ma’lumotlarga ko‘ra, favqulodda vaziyat qurbonlari soni 35 nafarga yetgan, ulardan uch nafari bolalardir. 15 avgust kuni respublikada motam kuni deb e’lon qilingandi.

Shundan so‘ng sodir bo‘lgan portlash munosabati bilan Qozog‘iston Prezidenti Qosim-Jomart To‘qayev hamda Tojikiston Prezidenti Imomali Rahmon Rossiya yetakchisi Vladimir Putinga hamdardlik telegrammasini yo‘llagandi.