Bo‘stonliqda o‘quvchi qizlar sinfdoshini kaltakladi

Toshkent viloyati Bo‘stonliq tumanida o‘quvchi qizlar sinfdoshini kaltaklab, haqoratladi. Bu haqda Bolalar ombudsmani xabar berdi.

Qayd etilishicha, Bolalar ombudsmanining shaxsiy qabuliga 3 aprel kuni 2010 yilda tug‘ilgan, Bo‘stonliq tumanida yashovchi E.O. (qiz bola) kelib, murojaat qilgan. 

E.O. o‘z murojaatida maktabda sinfdoshlari tomonidan muttasil tazyiq va bullingga uchrayotganligi, bu holatga maktab ma’muriyati ham, boshqa mas’ullar ham e’tiborsiz ekanligini bildirgan.

"Bolalar ombudsmani so‘rovi asosida Maktabgacha va maktab ta’limi vazirligi va Ichki ishlar organlari mazkur holatni o‘rgandi. Bo‘stonliq tumani MMT bo‘limi o‘rganishi  davomida joriy yilning 18 mart kuni informatika darsida E.O., S.M., M.K., K.V. lar (barchasi qizlar) o‘zaro gap talashib qolishgani, dars mashg‘ulotlari tugaganidan so‘ng nizoni hal qilish uchun sinfxonada yig‘ilib, o‘zaro janjallashgani va 3 nafar qiz birgalikda E.O.ni urgani, uni turli haqoratli so‘zlar bilan kamsitishgani ma’lum bo‘ldi", deyiladi xabarda. 

Bo‘stonliq tumani, "Markaziy" MFY profilaktika inspektori tomonidan bolalar o‘rtasidagi bu holat bo‘yicha tergovga qadar tekshiruv olib borilib, voyaga yetmagan o‘quvchi qizlar E.O. va K.V.ga sud tibbiyot ekspertizasi tayinlangan va ularning yengil tan jarohati olganliklari aniqlangan. 

"Mazkur bulling holati yuzasidan S.M., M.K., K.V.larning ota-onalari Ma’muriy javobgarlik to‘g‘risidagi kodeksning 47 - moddasi 1 - qismi (Bolalarni tarbiyalash va ularga ta’lim berish borasidagi majburiyatlarni bajarmaslik) asosida ma’muriy javobgarlikka tortildi. Qizlar bilan maxsus psixologik korreksion ish olib borish uchun psixolog biriktirildi", deyiladi ombudsman ma’lumotida.

Maktab rahbariyati va inspektor-psixolog bolalar o‘rtasida bu kabi bulling holatlariga yo‘l qo‘ymaslik bo‘yicha tegishlicha ogohlantirilgan.