Bugungacha O‘zbekistondan Turkiyaga qancha yordam yuborildi?

O‘zbekiston Turkiyaning vayronkor zilzilalardan jabr ko‘rgan hududlariga 170 tonna gumanitar yordam jo‘natdi. Bu haqda Turkiyaning Toshkentdagi elchixonasi matbuot xizmati xabar berdi. 

O‘zbekistonda Turkiya diplomatik missiyasi koordinatsiyasida O‘zbekiston Savdo-sanoat palatasi, “Yoshlar – kelajagimiz” jamg‘armasi, O‘zbek-turk ishbilarmonlar uyushmasi, Tashqi iqtisodiy aloqalar kengashi, Turkiya-O‘zbekiston ishbilarmonlar kengashi, Mustaqil sanoatchilar va tadbirkorlar uyushmasi O‘zbekiston bo‘limi, shuningdek, fuqarolik jamiyati bilan hamkorlikda boshlangan gumanitar aksiya davom etmoqda.

45 tonna dori-darmon va tibbiy buyumlar, 8 tonna oziq-ovqat, 90 tonna kiyim-kechak, poyabzal, ko‘rpa-to‘shak, yostiq, bolalar tagliklari va gigiyena vositalari, 130 generator, 700 elektr isitgich va boshqa zarur buyumlardan iborat 170 tonna insonparvarlik yordami to‘planib, Turkiyaga jo‘natilgan.  

Gumanitar yuk 6 ta yuk samolyoti va 7 ta yuk mashinasida Turkiyaning turli mintaqalariga yetkazilgan.   

Bundan tashqari, moliyaviy manbalar shaklida yordam yig‘ish davom etmoqda.  

Zilziladan jabr ko‘rgan hududlarda o‘zbekistonlik oshpazlar besh ming kishiga ikki mahal ovqat tarqatishni tashkil qilgan.  

O‘zbekiston madaniyat, tadqiqot va birdamlik uyushmasi (Istanbul) ko‘ngillilari va O‘zbekistondan 100 kishidan iborat qidiruv-qutqaruv guruhi tabiiy ofat zonasiga yetib borgan.   

Jabrlanganlarga dala shifoxonalarida 71 nafar o‘zbekistonlik shifokor yordam ko‘rsatmoqda.

Eslatib o‘tamiz, O‘zbekiston Respublikasi Prezidenti Shavkat Mirziyoyev topshirig‘i bilan tabiiy ofat oqibatlarini bartaraf etish maqsadida 7 fevral kuni O‘zbekistondan Turkiyaga gumanitar yordam va qutqaruvchilar guruhi jo‘natildi. Dastlabki guruhdan 100 nafar qutqaruvchi o‘rin oldi. 

Oradan ikki kun o‘tib, 9 fevral kuni O‘zbekiston 71 kishidan iborat harbiy-tibbiy va qidiruv-qutqaruv guruhini Turkiyaga yo‘lladi. Shu kuni maxsus bort 11 nafar O‘zbekiston va 6 nafar Qirg‘iziston fuqarolarini zilzila sodir bo‘lgan hududlardan olib qaytdi.