Boksning futboldagi “investori”

Bahodir Jalolov, Isroil Madrimov, Murodjon Ahmadaliyev va boshqa bir qator o‘zbek boksi yulduzlarining bugungi darajasiga chiqishiga ko‘plab insonlarning mehnati singgan. Shular qatorida o‘zbekistonlik mashhur, futbolchi, O‘zbekistonning bir necha klublaridagi yorqin faoliyati bilan tanilgan Oybek Qilichevning ham hissasi katta.

O‘zbekiston boks terma jamoasi bosh murabbiyi To‘lqin Qilichevning ukasi, Olimpiada chempioni Bahodir Jalolovning qayniakasi hisoblangan Oybek Qilichev o‘z vaqtida futbolchi bo‘lib, yaxshgina daromad topib yurgan kezlarda akasiga bugungi boks yulduzlarining kelajagi uchun maoshidan pul berib, o‘zbek charm qo‘lqop uslarining ta’minoti uchun “investitsiya” kiritgan shaxs hisoblanadi.

Shu bilan bir qatorda, Oybek Qilichev futbolda jarima to‘plarini qoyillatib tepishi, yakkurashlardagi faolligi va yaxshi texnikasi bilan ham futbol ishqibozlariga tanish.

QALAMPIR.UZ Srechko Katanets boshchiligidagi O‘zbekiston milliy terma jamoasining o‘yinlari keng muhokama bo‘layotgan bir vaqtda Qilichevga mikrofon tutib, terma jamoaning Jahon chempionatiga chiqish imkoniyatlari, O‘zbekiston chempionati va o‘zbek boksining kelajagi haqida suhbat qurdi.

“Oldingi murabbiylar terma jamoaga kelsa, o‘zini futbolchilari bilan kelardi va boshqa iste’dodlar chetda qolib ketardi. Katanes esa terma jamoani Jahon chempionatiga olib chiqish uchun kelgan va bu yerda hech kimni tanimaydi. Haqiqiy iste’dodi va mahorati bor futbolchilardan foydalanib, terma jamoamizni nasib etsa, JCHga olib chiqa oladi. Hozirgi vaqtda uni ishdan bo‘shatish noto‘g‘ri qaror bo‘ladi”, deydi Qilichev.

Oybek Qilichev futbolchilik faoliyati davomida O‘zbekistonning bir qator klublarida, shuningdek, Eron, Birlashgan Arab Amirliklari va Malayziya chempionatlarida to‘p tepgan. 

Qilichevning QALAMPIR.UZ’ga ma’lum qilishicha, u hozirda faoliyatini yakunlagan va asosiy e’tiborini oilasiga qaratmoqda. 

Ma’lumot uchun, Oybek Qilichev 1989 yilda Jizzaxda tug‘ilgan. Futbolchilik faoliyati davomida 2 karra O‘zbekiston chempionligini qo‘lga kiritgan. Turli yillarda O‘zbekiston yoshlar va Olimpiya terma jamoasida to‘p tepgan.