Bokschi jang vaqtida hushidan ketib, vafot etdi (video)

Joriy yilning 29 mart kuni Ganada bo‘lib o‘tgan boks kechasida fojiali hodisa yuz berdi – 40 yoshli bokschi jang vaqtida hushidan ketdi va shifoxonada vafot etdi. Bu haqda “Africa News” xabar berdi.

Nashrning yozishicha, jang Bel 7Star Ghana Professional Boxing League turniri doirasida o‘tkazilgan. Ringda 40 yoshli Gabriel Oluvasegun Olanrevaju va 22 yoshli Jon Mbanugu to‘qnash kelgan. Uchinchi raundda zarbalar almashinuvi chog‘ida Olanrevaju birdan orqaga chekinib, muvozanatini yo‘qotgan va ringga qattiq yiqilgan.

Referi Richard Amevi bokschining harakat qilmayotganini tezda anglab, jangni to‘xtatgan va shifokorlar hamda tez tibbiy yordam brigadasini chaqirgan. Shifokorlarning o‘z vaqtida qilgan harakatlariga qaramay, bokschini qutqarib bo‘lmagan – u shifoxonada vafot etgan.

Gana boks boshqarmasi va turnir tashkilotchisi Osibor Boxing Promotions hodisa yuzasidan politsiyaga barcha zarur ma’lumot va materiallarni taqdim etganini ma’lum qilgan. Tegishli davlat organlari ham xabardor qilingan. Bokschining o‘lim sababi ekspertiza tomonidan aniqlanadi.

Nashrning qayd etishicha, Gabriel Oluvasegun Olanrevaju nigeriyalik bo‘lgan. Uning faoliyatida 13 ta g‘alaba, 8 ta mag‘lubiyat va 2 ta durang bor. U 2019 yil iyul oyida professional boksda debyut qilgan. Olanrevaju Nigeriyaning eng yaxshi bokschilari ro‘yxatida yettinchi o‘rinda turgan. 

Eslatib o‘tamiz, avvalroq “Shimol o‘g‘li” taxallusi bilan tanilgan turkiyalik san’atkor o‘z konsertida, muxlislari oldida sahnaga yiqilib tushib, bir muddatdan so‘ng shifoxonada olamdan o‘tgan edi. 58 yoshli san’atkor konsert chog‘ida yurak xurujiga uchragani ma’lum bo‘lgan.