Боксчи жанг вақтида ҳушидан кетиб, вафот этди (видео)

Жорий йилнинг 29 март куни Ганада бўлиб ўтган бокс кечасида фожиали ҳодиса юз берди – 40 ёшли боксчи жанг вақтида ҳушидан кетди ва шифохонада вафот этди. Бу ҳақда “Africa News” хабар берди.

Нашрнинг ёзишича, жанг Bel 7Star Ghana Professional Boxing League турнири доирасида ўтказилган. Рингда 40 ёшли Габриэль Олувасегун Оланреважу ва 22 ёшли Жон Мбанугу тўқнаш келган. Учинчи раундда зарбалар алмашинуви чоғида Оланреважу бирдан орқага чекиниб, мувозанатини йўқотган ва рингга қаттиқ йиқилган.

Рефери Ричард Амеви боксчининг ҳаракат қилмаётганини тезда англаб, жангни тўхтатган ва шифокорлар ҳамда тез тиббий ёрдам бригадасини чақирган. Шифокорларнинг ўз вақтида қилган ҳаракатларига қарамай, боксчини қутқариб бўлмаган – у шифохонада вафот этган.

Гана бокс бошқармаси ва турнир ташкилотчиси Osibor Boxing Promotions ҳодиса юзасидан полицияга барча зарур маълумот ва материалларни тақдим этганини маълум қилган. Тегишли давлат органлари ҳам хабардор қилинган. Боксчининг ўлим сабаби экспертиза томонидан аниқланади.

Нашрнинг қайд этишича, Габриэль Олувасегун Оланреважу нигериялик бўлган. Унинг фаолиятида 13 та ғалаба, 8 та мағлубият ва 2 та дуранг бор. У 2019 йил июль ойида профессионал боксда дебют қилган. Оланреважу Нигериянинг энг яхши боксчилари рўйхатида еттинчи ўринда турган. 

Эслатиб ўтамиз, аввалроқ “Шимол ўғли” тахаллуси билан танилган туркиялик санъаткор ўз концертида, мухлислари олдида саҳнага йиқилиб тушиб, бир муддатдан сўнг шифохонада оламдан ўтган эди. 58 ёшли санъаткор концерт чоғида юрак хуружига учрагани маълум бўлган.