3 карра Олимпиада ва 5 карра жаҳон чемпиони кўчада овқат излаяпти (видео)

Ижтимоий тармоқларда бокс бўйича уч карра Олимпия чемпиони Феликс Савоннинг Куба кўчаларида овқат излаётгани акс этган видео кенг тарқалди. Ролик “BoxeoCubano” аккаунтида эълон қилинди.

Видеода Савондан нима қилаётгани сўралганда, у: “Ҳеч қандай алоҳида нарса йўқ, ейиш учун овқат излаяпман”, деб жавоб берган.

Ролик 1,8 миллион марта кўрилган ва 2 900 дан ортиқ изоҳ тўплаган. Кейинчалик кубалик комик Лимай Бланко Савон билан учрашгани акс этган видеони ҳам эълон қилди. У боксчига овқат ва Муқаддас Китоб берган, шунингдек, бошқа маиший буюмлар билан ҳам ёрдам беришни ваъда қилган.

Маълумотларга кўра, Савон 2018 йилда вояга етмаган шахсга нисбатан жинсий тажовуз содир этгани учун қамоқ жазосига ҳукм қилинган. У 2024 йилда шартли равишда озодликка чиқарилган.

Савон аввалроқ Майк Тайсон билан жанг учун 10 миллион доллар, Эвандер Холифилд билан жанг учун 12 миллион доллар ва Майкл Беннет билан жанг учун 15 миллион долларлик таклифларни рад этганини айтган. У бундай қарорини халқи ва ватанига садоқати билан изоҳлаган. Шунингдек, профессионал бокс орқали пул ишлашни истамаганини билдирган.

Маълумот учун, 59 ёшли Феликс Савон 1992, 1996 ва 2000 йилларда Олимпия ўйинларида олтин медални қўлга киритган. У, шунингдек, 1986, 1989, 1991, 1993, 1995 ва 1997 йилларда жаҳон чемпиони бўлган.