Boks mundialining dastlabki bosqichida o‘zbekistonliklarga kimlar raqib bo‘ladi?

Kecha, 30 aprel kuni Toshkent shahri mezbonlik qilayotgan boks bo‘yicha kattalar o‘rtasidagi Jahon chempionati bahslariga qur’a tashlandi.

Umumiy 13 ta vaznda O‘zbekiston sharafini himoya qiladigan charm qo‘lqop ustalarining raqibi ma’lum bo‘ldi. 

- 48 kgda Shodiyorjon Meliqo‘ziyev qozog‘istonlik Sanjar Tashkenbay bilan to‘qnash keladi. -51 kgda Rio-2016 Olimpiadasi g‘olibi Hasanboy Do‘smatov esa meksikalik Kastenada Ximenes bilan jang qiladi.  -54 kg vazn toifasida  Oybek Jo‘rayev serbiyalik Tamir Galanov bilan jang olib borsa, - 57 kgda Abdumalik Halakov gvineyalik Alikok va turkmanistonlik Giljanov bahsi g‘olibi bilan kuch sinashadi. 

- 60 kgda Mujbillo Tursunov hindistonlik Singh Varinderga, -71 kg vazn toifasida Saidjamshid Jafarov esa Mozambik vakili Muxanga qarshi ringga chiqadi. -63,5 kg vaznda Ruslan Abdullayev bahslarni 1/16 finaldan boshlaydi va unga puerto-rikolik Febus raqiblik qiladi. - 67 kgda Asadxo‘ja Mo‘ydinxo‘jayev yaponiyalik Muka Vakita va polshalik Szot jangi g‘olibi bilan bahs olib boradi. 

-75 kgda A’loxon Abdullayev xitoylik Jaogaga qarshi bellashsa, - 80 kgda Jasur Yo‘ldoshev saralash bahsida jazoirlik Nemochi bilan kuch sinashadi. - 86 kg vaznda Shohjahon Abdullayev afrikalik Nlandu Mbeli bilan, -92 kgda Lazizbek Mullajonov kolumbiyalik Kolorado Urtado bilan jang qiladi. Superog‘ir vazn toifasida O‘zbekiston sharafini himoya qiladigan Bahodir Jalolov esa ishtirokini nimchorak finaldan boshlaydi. Unda Jalolov turkmanistonlik Baki To‘ychiyev va Bahrayn vakili Danis Latipov jangi g‘olibiga qarshi ringga ko‘tariladi.

Mundialning dastlabki kunida faqatgina - 60 kgda Mujbillo Tursunov ishtirokini boshlaydi. Uning jangi Toshkent vaqti bilan 19:30 keyin boshlanishi kutilmoqda.