Бокс мундиалининг дастлабки босқичида ўзбекистонликларга кимлар рақиб бўлади?

Кеча, 30 апрель куни Тошкент шаҳри мезбонлик қилаётган бокс бўйича катталар ўртасидаги Жаҳон чемпионати баҳсларига қуръа ташланди.

Умумий 13 та вазнда Ўзбекистон шарафини ҳимоя қиладиган чарм қўлқоп усталарининг рақиби маълум бўлди. 

- 48 кгда Шодиёржон Мелиқўзиев қозоғистонлик Санжар Ташкенбай билан тўқнаш келади. -51 кгда Рио-2016 Олимпиадаси ғолиби Ҳасанбой Дўсматов эса мексикалик Кастенада Хименес билан жанг қилади.  -54 кг вазн тоифасида  Ойбек Жўраев сербиялик Тамир Галанов билан жанг олиб борса, - 57 кгда Абдумалик Ҳалаков гвинеялик Аликок ва туркманистонлик Гилжанов баҳси ғолиби билан куч синашади. 

- 60 кгда Мужбилло Турсунов ҳиндистонлик Сингҳ Вариндерга, -71 кг вазн тоифасида Саиджамшид Жафаров эса Мозамбик вакили Муханга қарши рингга чиқади. -63,5 кг вазнда Руслан Абдуллаев баҳсларни 1/16 финалдан бошлайди ва унга пуэрто-риколик Фебус рақиблик қилади. - 67 кгда Асадхўжа Мўйдинхўжаев япониялик Мука Вакита ва польшалик Сзот жанги ғолиби билан баҳс олиб боради. 

-75 кгда Аълохон Абдуллаев хитойлик Жаогага қарши беллашса, - 80 кгда Жасур Йўлдошев саралаш баҳсида жазоирлик Немочи билан куч синашади. - 86 кг вазнда Шоҳжаҳон Абдуллаев африкалик Нланду Мбели билан, -92 кгда Лазизбек Муллажонов колумбиялик Колорадо Уртадо билан жанг қилади. Супероғир вазн тоифасида Ўзбекистон шарафини ҳимоя қиладиган Баҳодир Жалолов эса иштирокини нимчорак финалдан бошлайди. Унда Жалолов туркманистонлик Баки Тўйчиев ва Баҳрайн вакили Данис Латипов жанги ғолибига қарши рингга кўтарилади.

Мундиалнинг дастлабки кунида фақатгина - 60 кгда Мужбилло Турсунов иштирокини бошлайди. Унинг жанги Тошкент вақти билан 19:30 кейин бошланиши кутилмоқда.