Biz PSJ hujumlariga dosh bera olmadik – Gvardiola

“Manchester Siti” bosh murabbiyi Xosep Gvardiola jamoasining Yevropa Chempionlar ligasi umumiy bosqichining 7-turida 2:4 hisobida uchralgan mag‘lubiyatga izoh berdi. 

PSJga qarshi uchrashuv davomida shaharliklar 2:0 hisobida oldinda borayotgandi, biroq yakunda o‘z darvozasidan 4 ta gol o‘tkazib yubordi.

“Birinchi bo‘limda bizda ham, ularda ham imkoniyatlar bo‘ldi, lekin raqibimiz vaziyatlardan ko‘proq foydalana oldi. Biz ham, ular ham 5 daqiqada 2 ta gol urdik. O‘tkazib yuborilgan birinchi golga dosh bera olmadik, bu o‘ziga xos nokaut bo‘ldi. PSJ yaxshiroq, tezroq va yakkakurashda faol harakatlandi. Biz bunga dosh bera olmadik”, deydi Gvardiola.

“Manchester Siti” hozirda 8 ochko bilan Yevropa Chempionlar ligasi turnir jadvalida 25-o‘rinda bormoqda. Jamoa musobaqaning pley-off bosqichiga to‘g‘ridan-to‘g‘ri yo‘l olish imkoniyatini yo‘qotdi. Endi “shaharliklar” keyingi turdagi g‘alaba orqali 1/16 finalga yo‘l olishi mumkin.