Биз ПСЖ ҳужумларига дош бера олмадик – Гвардиола

“Манчестер Сити” бош мураббийи Хосеп Гвардиола жамоасининг Европа Чемпионлар лигаси умумий босқичининг 7-турида 2:4 ҳисобида учралган мағлубиятга изоҳ берди. 

ПСЖга қарши учрашув давомида шаҳарликлар 2:0 ҳисобида олдинда бораётганди, бироқ якунда ўз дарвозасидан 4 та гол ўтказиб юборди.

“Биринчи бўлимда бизда ҳам, уларда ҳам имкониятлар бўлди, лекин рақибимиз вазиятлардан кўпроқ фойдалана олди. Биз ҳам, улар ҳам 5 дақиқада 2 та гол урдик. Ўтказиб юборилган биринчи голга дош бера олмадик, бу ўзига хос нокаут бўлди. ПСЖ яхшироқ, тезроқ ва яккакурашда фаол ҳаракатланди. Биз бунга дош бера олмадик”, дейди Гвардиола.

“Манчестер Сити” ҳозирда 8 очко билан Европа Чемпионлар лигаси турнир жадвалида 25-ўринда бормоқда. Жамоа мусобақанинг плей-офф босқичига тўғридан-тўғри йўл олиш имкониятини йўқотди. Энди “шаҳарликлар” кейинги турдаги ғалаба орқали 1/16 финалга йўл олиши мумкин.