“Biz korporativ feodalizm ostida yashamaymiz”. Nyu-Yorkda aktyor va yozuvchilarning ish tashlash mitinglari davom etmoqda

Gollivud kinostudiyalari bilan kelishmovchilik oqibatida yuzaga kelgan ish tashlash mitinglari davom etmoqda. Navbatdagi miting kecha, 25 iyul kuni Nyu-York shahrida bo‘lib o‘tdi. Ushbu mitingga Brayan Krenston boshchilik qildi va ta’sirli nutq so‘zladi. Bu haqda “The Guardian” nashri xabar berdi.

Times maydonida o‘tkazilgan ushbu mitingga odatdagidan ko‘proq yulduzlar tashrif buyurdi. Unda “Oskar” va ikki karra “Oltin Globus” mukofotlari sovrindori aktyor Brayan Krenston Disney bosh direktori Bob Igerga qaratilgan olovli nutq bilan chiqish qildi. 

“Bilaman, janob, siz narsalarga boshqacha ob’ektiv nazar bilan qaraysiz. Biz kimligimizni tushunishingizni kutmaymiz. Ammo sizdan ishimizni robotlarga bermaymiz, deb aytganimizda, bizni tinglashingizni so‘raymiz. Bizdan ishlash va yetarlicha pul topish huquqimizni tortib olmaysiz. Va nihoyat, eng muhimi, biz qadr-qimmatimizni olib qo‘yishingizga yo‘l qo‘ymaymiz!» dedi u o‘z nutqida.

43 yildan buyon kino sanoatida o‘z faoliyatini olib borayotgan aktrisa Kristin Baranski ham aktyorlar huquqlarini himoya qilish targ‘iboti bilan chiqdi.

“Biz korporativ feodalizm ostida yashamaymiz. Vaqt keldi, ishlarni to‘g‘rilash vaqti keldi. Bizning hissamiz ahamiyatsiz bo‘lmaydi va bizni tunashlariga yo‘l qo‘ymaymiz”, dedi u.

SAG-AFTRA’ning milliy ijrochi direktori va bosh muzokarachisi Dunkan Krabtri bunday mitinglar kinostudiyalar aktyorlar gildiyasi va uning hamkor tashkilotlari bilan muzokaraga kelmaguncha davom etishini bildirdi. 

“Bu kompaniyalar adolatli va hurmatli bitim tuzmaguncha tugamaydi. Biz ish tashlashda davom etamiz, huquqlarimizni suiiste’mol qilishlariga “yo‘q” deyishni davom ettiramiz. To‘g‘ri narsani himoya qilish kerak bo‘lgan vaqt bo‘ladi va bu vaqt – hozir”, dedi direktor.

Eslatib o‘tamiz, amerikalik aktyorlar uyushmasi SAG-AFTRA va uning muzokarachilari 12 iyul kuni Gollivud studiyalari bilan kelishuvga erishib bo‘lmagani sabab ish tashlashni tavsiya qildi.

Keyinchalik Mualliflar gildiyasi sun’iy intellekt kompaniyalarini ularning mualliflik materiallaridan noqonuniy foydalanganlikda ayblab, to‘lov talab qildi.

Ushbu mitinglar fonida aktyor va yozuvchilar film premeralari va tadbirlariga tashrif buyurmay qo‘ydi. Natijada Gollivudning doim yulduzlar bilan gavjum bo‘ladigan festevallari huvillab qoldi.

Sevara Husniddinova