Bayden Rossiyaning yonini olayotgan Si Szinpin bilan gaplashib olmoqchi

AQSH Prezidenti Jo Bayden va Xitoy rahbari Si Szinpin yaqin haftalarda telefon orqali muloqot qilishi mumkin. Bu haqda AQSH rahbarining milliy xavfsizlik bo‘yicha yordamchisi Jeyk Sallivan ma’lum qildi.  

Undan Xitoy Kommunistik partiyasi Markaziy qo‘mitasi tashqi ishlar komissiyasi devonxonasi rahbari, Siyosiy byuro a’zosi Yan Szechi bilan suhbat chog‘ida ikki davlat rahbarlari o‘rtasida bo‘lishi mumkin bo‘lgan telefon suhbati muhokama qilingan-qilinmaganligi so‘ralgan. 

“Bu sodir bo‘lmadi. Lekin Prezident Bayden va XXR raisi Si Szinpin kelgusi haftalarda yana telefon orqali gaplashsalar, hayron bo‘lmayman”, degan Sallivan. 

Sallivan Yan Szechi bilan muzokaralar chog‘ida AQSH Shimoliy Koreyaning yadroviy va ballistik raketa dasturidan  tashvishda ekani haqida ochiq gapirgan.

“Bu Xitoy manfaatlariga mos kelmaydi. Bu Amerika manfaatlariga mos kelmaydi. Xitoy provokatsion harakatlar ehtimolini kamaytirish uchun barcha mumkin bo‘lgan choralarni ko‘rib chiqishi kerak”, deya qo‘shimcha qilgan Sallivan.

Undan nega so‘nggi paytlarda AQSH ma’muriyati rasmiylari xitoylik hamkasblari bilan kamdan-kam muloqot qilayotgani so‘ralgan. Baydenning maslahatchisi joriy yilning 18 may kuni Yan Szechi bilan “yaxshi, uzoq suhbat” o‘tkazganini va “yetti yoki sakkiz hafta oldin” ular Rimda uchrashganini aytgan. 

“Oq uy Xitoy bilan yuqori darajadagi diplomatik aloqalarni sekinlashtirmayapti yoki cheklamayapti”, degan Sallivan. 

Ma’lumot o‘rnida, o‘tgan yilning 16 noyabr kuni Bayden va Si Szinpin onlayn uchrashuv o‘tkazdi va unda hamkorlikning keng ko‘lamli masalalari muhokama qilindi. Xitoy TIV ma’lumotlariga ko‘ra, maslahatlashuvlar yakunlari bo‘yicha ikki davlat rahbarlari qator masalalar bo‘yicha konsensusga erishgan va aloqalarni mustahkamlashga o‘zaro tayyor ekanliklarini bildirgan. Bu Bayden 2021 yil yanvarida lavozimga kirishganidan beri ikki yetakchi o‘rtasidagi birinchi uchrashuv bo‘lgan. Bayden va Si Szinpin o‘rtasidagi oxirgi telefon suhbati 10 sentyabr kuni bo‘lib o‘tgan.