“Baxti Tashkentskiy” qaysi moddalar bilan ayblanayotgani ma’lum bo‘ldi

“Baxti Tashkentskiy” laqabi bilan tanilgan Baxtiyor Qudratullayev ko‘p miqdorda giyohvandlik vositalarini saqlash bilan ayblanmoqda. Bu haqda Toshkent shahar ichki ishlar bosh boshqarmasi xabar berdi. 

Ma’lumki, bir necha kundan buyon Toshkent shahrida kriminogen vaziyatni yaxshilash bo‘yicha keng qamrovli tezkor-profilaktik tadbirlar o‘tkazilmoqda. 

Ushbu tadbirlar doirasida “Baxti Tashkentskiy” nomi bilan tanilgan 1971 yilda tug‘ilgan Baxtiyor Qudratullayev ham qo‘lga olingan. 

U O‘zbekiston Respublikasi Jinoyat kodeksining 165-moddasi (Tovlamachilik) 3-qismi “a” bandi –  juda ko‘p miqdorda tovlamachilik va 276-modda (Giyovandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi “a” bandi – ko‘p miqdorda giyohvandlik vositalarini saqlash bilan gumonlanmoqda.

Ma’lumot uchun, Jinoyat kodeksining 165-moddasi (Tovlamachilik) 3-qismi “a” bandi sanksiyasi bo‘yicha aybdor o‘n yildan o‘n besh yilgacha ozodlikdan mahrum qilish bilan jazolanadi. 276-modda (Giyovandlik vositalari, ularning analoglari yoki psixotrop moddalarni o‘tkazish maqsadini ko‘zlamay qonunga xilof ravishda tayyorlash, egallash, saqlash va boshqa harakatlar) 2-qismi “a” bandiga ko‘ra, ayblanuvchi uch yildan besh yilgacha ozodlikni cheklash yoxud uch yildan besh yilgacha ozodlikdan mahrum qilish bilan jazolanadi.

Eslatib o‘tamiz, joriy yilning 2 dekabr kuni Toshkent shahar Ichki ishlar bosh boshqarmasi Toshkent shahrida kriminogen vaziyatni yaxshilash bo‘yicha keng qamrovli tezkor-profilaktik tadbirlar o‘tkazilayotganini ma’lum qilgan edi. Shundan so‘ng, “Saidaziz medgorodok” nomi bilan tanilgan Saidaziz Saidaliyev, “Baxti Tashkentskiy” laqabi bilan tanilgan Baxtiyor Qudratullayev, Dilshod Tulkinovich Sharipov, Anvar Babarajabovich Mirzaxanov qo‘lga olingani haqida rasmiy xabar berdi. 

Shuningdek, Farg‘onada MMA jangchisi Humoyun To‘xtamurodov qo‘lga olingan.