Bag‘dodiyning vorisi kimligi ma’lum bo‘ldi

ISHID terrorchilik guruhining yetakchisi Abu Bakr al-Bag‘dodiyning o‘limi oktyabr oyi oxiridagi eng shov-shuvli voqea bo‘ldi. Biroq bu bilan ISHID yo‘q bo‘lib ketmadi. Al-Bag‘dodiydan keyin terrorchilik tashkilotiga rahbar bo‘lish uchun ikki nomzod borligi haqida xabar bergan edik.

ISHID o‘z yetakchisi Abu Bakr al-Bag‘dodiy o‘ldirilganini rasman tasdiqlab, yangi yetakchi nomini ma’lum qildi. Abu Ibrohim al-Hoshimi al-Qurayshi ISHIDning yangi rahbari bo‘ldi. Bu haqda "Euronews" xabar berdi.

Xabar ISHID tomonidan kecha, 31 oktyabr kuni audioyozuv shaklida tarqatildi. Ta’kidlanishicha, al-Bag‘dodiy Abu Ibrohim al-Hoshimi al-Qurayshini tiriklidayoq o‘z merosxo‘ri sifatida e’lon qilgan.

Abu Bakr al-Bag‘dodiy bir necha yil davomida qidiruvda bo‘lgan. 2011 yilda rasmiy Vashington uning kallasi uchun 10 mln dollar, 2017 yilda esa 25 mln dollar mukofot puli va’da qilgan.