Arda Guler “Real”da qaysi raqamni tanlagani ma’lum bo‘ldi

18 yoshli turkiyalik yarim himoyachi Arda Guler “Real Madrid”da 24 raqamida to‘p tepadigan bo‘ldi. Bu haqda Madrid klubi matbuot xizmati xabar berdi.

Unga ko‘ra, “turk Messi”si eski jamoasidagi 10-raqamni emas balki shu vaqtga qadar boshqa futbolchiga tegishli bo‘lgan 24 raqamini egalladi. “Real”da bu raqam ispaniyalik himoyachi Xesus Valexoga tegishli edi. Valexo iyun oyining o‘rtalarida jamoaga yangi kelgan Jud Bellingem foydasiga 5 raqamidan voz kechgandi. Endi yangi mavsumda Valexo 25 raqami ostida o‘ynaydigan bo‘ldi.

Joriy yilning 5 iyul kuni klub bilan kelishuvga erishgan Guler 6 yillik shartnoma asosida “Fenerbaxche”dan “Real Madrid” safiga kelib qo‘shildi. Bugun, 7 iyul kuni u jamoa uchun tibbiy ko‘rikdan o‘tdi va rasmiy tanishtiruv marosimida qatnashdi. 

Ma’lumot uchun, “Real Madrid” futbolchi evaziga “Fenerbaxche”ga 20 million yevro to‘ladi. Shuningdek, “Fenerbaxche” Gulerning keyingi transferidan 20 foiz daromadni o‘ziniki qilib oladi. Ta’kidlash joizki, Arda Guler o‘tgan mavsum 35 uchrashuvda maydonga tushib, 6 ta gol urgan va 7 ta golli uzatmani amalga oshirgandi.