Andijonda er xotinini pichoqlab o‘ldirdi

Kecha, 12 fevral kuni ijtimoiy tarmoqlarda Oltinko‘l tumanida yashovchi fuqaro turmush o‘rtog‘ini o‘ldirgani haqida xabarlar tarqaldi. Mazkur holat yuzasidan Andijon viloyati prokuraturasi munosabat bildirdi. 

Aniqlanishicha, joriy yil 5 fevral kuni fuqaro S.M. turmush o‘rtog‘i J.M. bilan o‘zaro janjal oqibatida xo‘jalik pichog‘i bilan uni qasddan o‘ldirgan. 

Mazkur holat yuzasidan Oltinko‘l tumani prokuraturasi tomonidan S.M.ga nisbatan Jinoyat kodeksining 97-moddasi (Qasddan odam o‘ldirish) 1-qismi bilan jinoyat ishi qo‘zg‘atilgan va S.M. protsessual tartibda ushlanib, qamoqqa olish ehtiyot chorasi qo‘llanilgan.

Bildirilishicha, jinoyat ishi bo‘yicha olib borilayotgan tergov harakatlari alohida nazoratga olingan, tergov xarakatlari davomida ishga oid barcha holatlar tekshirilib, qonuniy qaror qabul qilinishi ta’minlanadi.

Eslatib o‘tamiz, avvalroq Toshkent viloyatida o‘z xotinini o‘ldirishda gumonlanayotgan erkak qo‘lga olingandi. 1997 yilda tug‘ilgan ayol o‘limidan 10 kun oldin doimiy janjallar tufayli ota uyiga qaytib kelgan. 8 fevral kuni tunda 1992 yilda tug‘ilgan eri ayolning ota-onasinikiga kelib, uni mashinasiga o‘tqazib, olib ketgan. Shundan so‘ng ayolning jasadi Olmaliq shahri hududidan topilgan. Uni o‘ldirishda gumonlangan erkak qo‘lga olingan.