Тошкент вилоятида хотинини ўлдиришда гумонланган эркак ушланди

Тошкент вилоятида ўз хотинини ўлдиришда гумонланаётган эркак қўлга олинди. Бу ҳақда QALAMPIR.UZ сўровига кўра, Бош прокуратура матбуот котиби Ҳаёт Шамсутдинов хабар берди.

Билдирилишича, 1997 йилда туғилган аёл ўлимидан 10 кун олдин доимий жанжаллар туфайли ота уйига қайтиб келган. 8 февраль куни тунда 1992 йилда туғилган эри аёлнинг ота-онасиникига келиб, уни машинасига ўтқазиб, олиб кетган.

Шундан сўнг аёлнинг жасади Олмалиқ шаҳри ҳудудидан топилган. Уни ўлдиришда гумонланган эркак қўлга олинган.

“Уни дарди фақат пул бўлган. Дориси учун пул керак бўлган. Қайнонаси ҳам доим гижгижлаб урдирарди. Қизим уларга пул топиб келиши керак эди. Уларнинг боқувчиси эди. Ҳимоя ордери берилганига қарамасдан уйга бостириб келди. Унга энг олий, оғир жазо берилишини хоҳлайман. У уйга келиб, қизимни қасддан ўлдирди, болаларни етим қолдирди. Қудам олдига эр-хотин уришади деб борсак, ўлдириб қўймаяпти-ку, деб жавоб берарди”,  дейди марҳуманинг онаси “Миллар” дастурига берган интервьюсида.

Бош прокуратурага кўра, ҳолат юзасидан Жиноят кодексининг 97-моддаси (Қасддан одам ўлдириш) билан жиноят иши қўзғатилган. Гумонланувчи процессуал тартибда ушланган, тергов ишлари олиб борилмоқда.

Эслатиб ўтамиз, аввалроқ Тошкент вилоятида эр хотинини ваҳшийларча калтаклаганди. Эр процессуал тартибда ушланиб, унга нисбатан Жиноят кодексининг 126-1-моддаси (оилавий маиший зўравонлик) билан жиноят иши қўзғатилган.