Andijonda harakatlanayotgan Lacetti yonib ketdi

Andijon shahrida harakatlanib ketayotgan Lacetti avtomobilidagi nosozlik tufayli mashinada yong‘in sodir bo‘ldi. Bu haqda viloyat Yo‘l harakati xavfsizligi boshqarmasi axborot xizmati ma’lum qildi.

Qayd etilishicha, bugun, 9 dekabr kuni soat 16:00 lar atrofida Andijon shahar Sanoat mahallasida yashovchi 1972 yilda tug‘ilgan fuqaro o‘zining boshqaruvidagi Lacetti rusumli avtomashinasida Andijon shahar Paxtaobod mahallasi hududidan o‘tgan A.Yo‘ldoshev ko‘chasida harakatlanib ketayotgan vaqtida transport vositasining oldi qismida elektr sim o‘tkazgichlaridan chiqqan qisqa tutashuv oqibatida yong‘in sodir bo‘lgan.

“Ko‘rilgan tezkor choralar natijasida ushbu yong‘in shahar FVB xodimlari tomonidan to‘liq bartaraf etilgan. Ushbu yong‘in oqibatida transport vositasi moddiy zararlangan, tan jarohati olgan shaxslar mavjud emas”, deyiladi xabarda.

Mazkur holat yuzasidan surishtiruv ishlari olib borilmoqda.

Eslatib o‘tamiz, avvalroq Toshkent shahar Yunusobod tumanida Matiz beton to‘siqqa to‘qnashib, yonib ketgandi.