“Allohning jazosidan qutula olmaydilar”. Erdo‘g‘an BMT minbarida ta’sirli nutq so‘zladi (video)

O‘ldirishdan hech qachon to‘ymaydigan “genotsid” hamma uchun vijdon masalasi bo‘lishi kerak. Bu haqda kecha, 22 sentyabr kuni Turkiya Prezidenti Rajab Toyib Erdo‘g‘an Birlashgan Millatlar Tashkiloti 81-Bosh Assambleyasidagi nutqi davomida gapirdi.

“Kechirasiz, lekin bu Toyib Erdo‘g‘anning shaxsiy masalasi emas. Bu – gumanitar masala. Bu – barchamiz uchun vijdon masalasi. Biz o‘ldirishdan hech qachon to‘ymaydigan genotsid tafakkuriga duch kelyapmiz”, deydi Turkiya Prezidenti. 

Uning aytishicha, 190 dan ortiq mamlakat irodasi atigi beshta mamlakat injiqligiga bo‘ysunadigan tizim adolatli tizim emasligini va u to‘liq ishonch uyg‘otishga yoki o‘rnatishga qodir emasligini tan olish kerak. Xavfsizlik Kengashi “dunyo beshtadan kattadir” tamoyiliga muvofiq mutlaqo isloh qilinishi kerak.

Erdo‘g‘an G‘azoni tiklash masalasini ham ko‘targan. Qolaversa, u poytaxti Quddus bo‘lgan mustaqil Falastin davlati barpo etilishiga ishonishini bildirgan.

“Biz bir yil avval Sharm ash-Shayxda imzolagan kelishuvga sodiq qolamiz. Endi biz G‘azoni qayta tiklashni imkon qadar tezroq boshlashimiz kerak. Shu munosabat bilan men sizlarni Isroilga yanada ko‘proq bosim o‘tkazishga chaqiraman. Hamma quyidagilarni tushunsin va qabul qilsin: Falastin davlatini bo‘g‘ishga urinishlar muvaffaqiyatsizlikka uchraydi. Inshaalloh, 1967 yilgi chegaralarga asoslangan, hududiy yaxlitlikka ega va poytaxti Sharqiy Quddus bo‘lgan mustaqil Falastin davlati barpo etiladigan o‘sha yaxshi kunlarni ko‘ramiz”, deydi Turkiya yetakchisi.

U o‘zi ko‘targan masala “ayrim toifaning” g‘ashiga tegishini, o‘ziga qarshi choralar ko‘rishlarini, lekin nima bo‘lsa ham mazlumlar tarafida turishini bildirgan.

“Bugun bu yerda aytgan haqiqatlarim, albatta, ba’zi odamlarning g‘ashiga tegadi, ularning huzur-halovatini buzadi va yolg‘onlarini fosh qiladi. Shuningdek, ular ovozimizni o‘chirishga urinib, har xil idrokni boshqarish operatsiyalariga murojaat qilishlarini ham yaxshi bilaman.

Marhum shoir Sezai Karakoch shunday degan edi: “Ular biz jim tursak, masala yo‘q bo‘lib ketadi, deb o‘ylashadi. Ammo biz jim tursak ham, tarix jim turmaydi. Tarix jim tursa ham, haqiqat jim turmaydi. Ular bizdan qutulsalar, muammo hal bo‘ladi, deb ishonishadi. Biroq ular bizdan qutulsalar ham, o‘z vijdonlari azobidan qutula olmaydilar. Vijdonlari azobidan qutulsalar ham, tarix azobidan qutula olmaydilar. Tarix azobidan qutulsalar ham, Allohning jazosidan qutula olmaydilar”.

Men, Rajab Toyib Erdo‘g‘an, vijdoni, tarixi va rahm-shafqati yo‘l ko‘rsatgan buyuk millatning Prezidenti sifatida, inshaalloh, Alloh menga umr berar ekan, shu minbardan turib, mazlumlarning, jabrdiydalarning va ovozsizlarning huquqlarini himoya qilishda davom etaman. Ularning ovozi bo‘lishda, ularning nomidan gapirishda va ular uchun kurashishda davom etaman. Agar kerak bo‘lsa, qiyinchilikka chidaymiz, agar kerak bo‘lsa, badalini to‘laymiz, lekin adolatsizlik qarshisida jim turmaymiz va zulmga hech qachon rozi bo‘lmaymiz”, deydi Erdo‘g‘an.

Eslatib o‘tamiz, avvalroq Rajab Toyib Erdo‘g‘an BMT minbarida G‘azo bugun nafaqat dunyodagi eng katta qabriston, balki dunyoda amputatsiya ko‘rsatkichi eng yuqori bo‘lgan mintaqa hisoblanishini, shuningdek, G‘azo – hozirgi davrning eng insoniylikka zid, eng uyatli qirg‘ini ekanini aytgan edi.