Alisher Usmonov Namanganda Xalqaro biznes markazi quradi

Milliarder Alisher Usmonov Namangan shahrida 6 gektar maydonda Xalqaro biznes markazi quradi. Bu haqda viloyat hokimligi Matbuot xizmati ma’lum qildi.

Usmonov tomonidan qurilishi rejalashtirilayotgan Xalqaro biznes markazi Namangan shahrining Amir Temur ko‘chasidagi 6 gektar maydondagi sobiq “Kichkintoylar bog‘i” hududida quriladi.

Ushbu markaz Kongress-xoll, biznes maktabi, mehmonxona, ekopark, sport-sog‘lomlashtirish inshootlarini o‘z ichiga oladi. Sun’iy ko‘llar, favvoralar, avtoturargohlar barpo etiladi. 

“Xalqaro biznes markazi qurilishi bahor oylaridan boshlanadi. Bu yerda kelgusida xalqaro simpoziumlar, biznes-forumlar o‘tkazilishi ko‘zda tutilgan. Shu orqali Namanganga investitsiyalar kirib kelishi jadallashadi, biznes-turizm uchun keng imkoniyatlar yaratiladi. Mazkur markaz Namanganning o‘ziga xos brendiga  aylanadi”, degan viloyat hokimi sobiq bog‘ hududiga borganida.

Shavkatjon Abdurazzaqov qurilish olib borilishi rejalashtirilgan hududda obodonlashtirishga e’tibor qaratish, kotlovan atrofida xavfsizlik masalalarini ko‘zdan qochirmaslik zarurligini ta’kidlagan. 

Xalqaro biznes markazi barpo etiladigan manzilda Qur’on tilovat qilinib, jonliq so‘yilgan.