AQSH va Rossiya bir-biriga qarshi tuzgan “qora ro‘yxati”ni e’lon qildi

AQSH Moliya vazirligi Rossiyaga qarshi sanksiyalar kengaytirilganini e’lon qildi. Amerika “qora ro‘yxati”ga Rossiya va boshqa mamlakatlardan 200 ga yaqin kompaniya va 46 jismoniy shaxs kiritildi. Cheklov qo‘yilganlar ro‘yxati vazirlik saytida e’lon qilindi.

E’tiborli jihati shundaki, “qora ro‘yxat”ga tushganlar orasida asli o‘zbekistonlik Vadim Ilmiyev Viktorovich ham bor. U 1966 yil 15 avgustda Samarqand shahrida tug‘ilgan. Millati ukrain bo‘lgan Vadim Ilmiyev 2022 yil may oyida Rossiya tomonidan bosib olingan Xerson viloyatidagi sog‘liqni saqlash boshqarmasiga yangi rahbar etib tayinlangan. 

“Prezident Putinning noqonuniy va asossiz urushi boshidan bizning global koalitsiyamiz Ukrainani qo‘llab-quvvatlashga e’tibor qaratdi, shu bilan birga Rossiyaning bosqinini amalga oshirish qobiliyatini kamsitmoqda. Bizning jamoaviy sa’y-harakatlarimiz Rossiyani o‘z armiyasini jihozlash uchun zarur bo‘lgan asosiy mablag‘lardan mahrum qildi va Kreml o‘zining urush mashinasini moliyalashtirish uchun oladigan daromadlarini keskin cheklaydi. Bugungi harakatlar Putinning o‘zining vahshiy bosqinini amalga oshirish qobiliyatiga qarshi kurashni yanada kuchaytiradi va Rossiyaning sanksiyalardan qochishga urinishlarini to‘xtatish bo‘yicha global sa’y-harakatlarimizni ilgari suradi”,  degan AQSH G‘aznachilik kotibi Janet Yellen.

AQSH tomonidan kiritilgan cheklov choralariga javoban Rossiya Tashqi ishlar vazirligi ham 500 nafar amerikalikni mamlakatga kirishini taqiqladi. Rossiya “qora ro‘yxatida” AQSHning sobiq prezidenti Barak Obama ham bor. 

“Stop-list”ga kiritilgan AQSH fuqarolari orasida kongressmenlar va Ukrainaga qurol yetkazib beruvchi harbiy-sanoat kompleksi kompaniyalari rahbarlari, teleboshlovchilar va jurnalistlar, ilmiy hodim va professorlar ham bor. 

“Shu munosabat bilan AQSHning Moskvadagi elchixonasining josuslik uchun hibsga olingan muxbiri E.Gershkovichga konsullik tashrifi so‘rovi Tashqi ishlar vaziri S.V.Lavrovning rossiyalik jurnalistlariga viza berishdan bosh tortishiga javoban yana bir bor rad etilganligini tasdiqlaymiz”, deyiladi Rossiya TIV bayonotida.

Eslatib o‘tamiz, oldinroq Bayden ma’muriyati Rossiyaga keng turdagi iste’mol tovarlari eksportini taqiqlagan va 71 ta kompaniyaga nisbatan sanksiyalar joriy qilingandi. Ular orasida Qirg‘iziston va Armanistonning bittadan kompaniyasi ham bor edi.