AQSH bilan kelishuvda NATO masalasi yo‘q – Zelenskiy

Ukraina va AQSH yerosti boyliklari bo‘yicha kelishuv loyihasi ustida ishlamoqda. Hujjatda Ukrainaning NATOga a’zoligi masalasi ko‘tarilmagan. Bu haqda Ukraina Prezidenti Vladimir Zelenskiy jurnalistlar bilan suhbat chog‘ida ma’lum qildi.

Uning qayd etishicha, ayni damda asosan amerikalik va ukrainalik huquqshunoslar kelishuv ustida ishlamoqda.

Shu bilan birga, davlat rahbari Trampning Ukraina go‘yoki AQSH bilan NATO a’zoligi bo‘yicha kelishuv imzolamoqchi ekani haqidagi so‘nggi bayonotiga javob qaytardi.

“Ushbu kelishuv va NATO masalasiga kelsak, bu kelishuvda unday gap yo‘q va bo‘lmagan ham”, deya ta’kidladi Prezident.

Yerosti boyliklari bo‘yicha kelishuv hali muhokamaning dastlabki bosqichida, chunki AQSH yaqinda Ukrainaga hujjatning to‘liq versiyasini taklif qildi. Dastlab tomonlar ramka bitimini imzolashni va shundan keyingina to‘liq huquqli kelishuvga o‘tishni rejalashtirgan.

Eslatib o‘tamiz, avvalroq AQSH Prezidenti Donald Tramp Zelenskiyning “NATO a’zoligi yoki shunga o‘xshash narsa” uchun AQSH bilan kelishuvga erishish niyati haqida “jurnalistlardan eshitganini” aytgandi.