Трамп Зеленскийга жуда катта муаммолар билан таҳдид қилди (видео)

north_east

Украина АҚШдан ресурс бўйича янги шартнома лойиҳасини олди – Зеленский

АҚШ Президенти Дональд Трамп Украина Президенти Владимир Зеленскийни Вашингтон ва Киев ўртасидаги фойдали қазилмалар бўйича келишувдан чиқиш ниятидаликда айблади. Бу ҳақда у кеча, 30 март куни Air Force One бортида журналистлар билан учрашувда маълум қилди.

“У ноёб ер металлари бўйича келишувдан чиқишга ҳаракат қилмоқда ва агар шундай бўлса, у муаммога дуч келади, катта муаммоларга дуч келади”, деди Тармп.

Трамп, шунингдек, Зеленский “НАТО аъзоси бўлишни хоҳлашини, лекин у ҳеч қачон НАТОга аъзо бўлмаслигини, буни тушуниб туришини” қўшимча қилди.

Бир кун аввал “Bloomberg” агентлиги Украина Дональд Трамп таклиф қилган иқтисодий келишувга Америка сармоясини кўпайтириш мажбуриятини киритиш учун ўзгартириш киритишни сўраши ҳақида хабар берди. “Bloomberg”нинг қайд этишича, таклиф лойиҳаси Вашингтонга Украинадаги барча йирик инфратузилма ва минерал инвестициялар устидан ҳеч қандай муддатсиз назоратни беради. Киев эса келишув шартлари мамлакатнинг Европа Иттифоқига кириш жараёнига путур етказиши ва уруш бошланганидан бери АҚШ томонидан кўрсатилган барча ҳарбий ва иқтисодий ёрдамни қайтаришни талаб қилиши мумкинлигидан хавотирда.

“Агар ҳамкорлик тўғрисидаги битим қабул қилинса, Қўшма Штатлар Украина иқтисодиётининг муҳим қисмига, жумладан, тоғ-кон саноати, нефть ва газ, муҳим фойдали қазилмалар, шунингдек, портлар, автомобиль ва темирйўлларга таъсир этувчи сармоявий қарорлар устидан самарали назоратга эга бўлади”, деб ёзади агентлик.

Қайд этилишича, Украина расмийлари америкалик ҳамкасблари билан суҳбат чоғида таклиф этилаётган ҳужжат юзасидан ўз хавотирларини билдирган. Қўшма Штатлар вакиллари эса, айниқса, Украинанинг Европа Иттифоқига кириши мумкинлиги нуқтаи назаридан уларга эътироз билдирмаган.

“Бу Вашингтон ўзгаришларни муҳокама қилиш учун очиқ бўлиши мумкинлигидан далолат беради”, дея номи ошкор этилмаган манбанинг позициясини хабар қилди “Bloomberg”.

Эслатиб ўтамиз, 27 март куни “Financial Times” газетаси ва “Bloomberg” агентлиги 23 март куни Киев томонидан қабул қилинган АҚШ ва Украина ўртасидаги фойдали қазилмалар бўйича янги келишув лойиҳаси Вашингтондан Украинанинг минерал ресурслари ва энергетика активлари устидан назоратни ўрнатиш бўйича анча тажовузкор талабларни ўз ичига олишини хабар қилганди. Бироқ  ҳужжатда ҳеч қандай хавфсизлик кафолатлари мавжуд эмас.