Украина АҚШдан ресурс бўйича янги шартнома лойиҳасини олди – Зеленский

Украина америкалик ҳамкорларидан минерал ресурслар бўйича келишувнинг янги таҳририни олди. Унинг формати ўзгартирилди. Бу ҳақда Украина Президенти Владимир Зеленский кеча, 28 март куни брифинг чоғидаги маълум қилди.

“Украина АҚШ ҳарбий ёрдамини қарз сифатида тан олмайди. Бизга ерости бойликлари бўйича янги шартнома лойиҳаси келди, бу аввалги келишувдан бутунлай бошқача ҳужжат. Энди АҚШда улар Украинага текин ёрдам бермасликларини очиқ айтишмоқда”, деди Украина Президенти. 

Зеленский Украина томони ушбу ҳужжатни текшириши кераклигини таъкидлади. Хусусан, адвокатлар музокаралар давомида таклиф қилинган барча келишувларни солиштиришлари керак. 

“Бу келишувни солиштириш керакми ёки бу бир хил келишувми. Мен биздан юқори даражадаги адвокатлардан аниқ кўриб чиқишни хоҳлайман. Адвокатлар бу келишувларнинг барчасини текшириб кўришсин. Мен томонимиз расман олган битимни қабул қиламан. Формат ўзгартирилди. Келинг, ушбу форматни ўрганамиз ва бу ҳақда гаплашамиз. Бизда Украина Конституцияси мавжуд”, деди Зеленский.

Украина Президенти, шунингдек, бир муддат олдин ушбу келишувни Бош вазир ўринбосари Юлия Свириденко АҚШ Молия вазири Скотт Бессент билан икки томонлама алоқада қабул қилганини таъкидлади.

Президентнинг айтишича, шу ҳафта Парижда бўлиб ўтган саммит чоғида Украина Европа ҳамкорларининг разведка маълумотлари ва ўқ-дорилар омборларига кириш, шунингдек, ҳаво ҳужумидан мудофаа тизимларини ишлаб чиқариш учун лицензиялар олиш бўйича келишувга эришган.

north_east

Трамп Зеленскийга нафрати туфайли Украинага қатъий шартлар қўйди – “Times”

“Айрим давлатлар билан Украинанинг разведка маълумотларига киришини кенгайтириш, европалик ҳамкасбларимиз эга бўлган тегишли технологиялар ва сунъий йўлдошлардан фойдаланиш бўйича келишувга эришилди. Биз баъзи раҳбарлар билан Украинанинг ўқ-дорилар омборига кириши бўйича келишувга эришдик. Биз ҳаво ҳужумига қарши мудофаа тизимларини ишлаб чиқариш учун лицензияни келишиб олдик, шунингдек, артиллериянинг айрим турлари учун лицензиялар устида ишлаймиз”, деди Зеленский. 

Европалик ҳамкорлар билан музокараларни шарҳлар экан, сиёсатчи “жуда тўғри ва аниқ натижага эришилганини” таъкидлади. Зеленскийнинг сўзларига кўра, Украина учун Франция томонидан эълон қилинган 2 миллиард евролик янги мудофаа пакетидан ташқари, барча етакчилар билан Украинага муҳим қўшимча мудофаа ёрдам пакетлари бўйича келишувга эришилган. Украина раҳбари бу масала бўйича апрель ойида бўлиб ўтадиган навбатдаги учрашувда маълум қилади.

Эслатиб ўтамиз, 27 март куни “Financial Times” газетаси ва “Bloomberg” агентлиги 23 март куни Киев томонидан қабул қилинган АҚШ ва Украина ўртасидаги фойдали қазилмалар бўйича янги келишув лойиҳаси Вашингтондан Украинанинг минерал ресурслари ва энергетика активлари устидан назоратни ўрнатиш бўйича анча тажовузкор талабларни ўз ичига олишини хабар қилганди. Бироқ  ҳужжатда ҳеч қандай хавфсизлик кафолатлари мавжуд эмас.