Ukraina AQSHdan resurs bo‘yicha yangi shartnoma loyihasini oldi – Zelenskiy

Ukraina amerikalik hamkorlaridan mineral resurslar bo‘yicha kelishuvning yangi tahririni oldi. Uning formati o‘zgartirildi. Bu haqda Ukraina Prezidenti Vladimir Zelenskiy kecha, 28 mart kuni brifing chog‘idagi ma’lum qildi.

“Ukraina AQSH harbiy yordamini qarz sifatida tan olmaydi. Bizga yerosti boyliklari bo‘yicha yangi shartnoma loyihasi keldi, bu avvalgi kelishuvdan butunlay boshqacha hujjat. Endi AQSHda ular Ukrainaga tekin yordam bermasliklarini ochiq aytishmoqda”, dedi Ukraina Prezidenti. 

Zelenskiy Ukraina tomoni ushbu hujjatni tekshirishi kerakligini ta’kidladi. Xususan, advokatlar muzokaralar davomida taklif qilingan barcha kelishuvlarni solishtirishlari kerak. 

“Bu kelishuvni solishtirish kerakmi yoki bu bir xil kelishuvmi. Men bizdan yuqori darajadagi advokatlardan aniq ko‘rib chiqishni xohlayman. Advokatlar bu kelishuvlarning barchasini tekshirib ko‘rishsin. Men tomonimiz rasman olgan bitimni qabul qilaman. Format o‘zgartirildi. Keling, ushbu formatni o‘rganamiz va bu haqda gaplashamiz. Bizda Ukraina Konstitutsiyasi mavjud”, dedi Zelenskiy.

Ukraina Prezidenti, shuningdek, bir muddat oldin ushbu kelishuvni Bosh vazir o‘rinbosari Yuliya Sviridenko AQSH Moliya vaziri Skott Bessent bilan ikki tomonlama aloqada qabul qilganini ta’kidladi.

Prezidentning aytishicha, shu hafta Parijda bo‘lib o‘tgan sammit chog‘ida Ukraina Yevropa hamkorlarining razvedka ma’lumotlari va o‘q-dorilar omborlariga kirish, shuningdek, havo hujumidan mudofaa tizimlarini ishlab chiqarish uchun litsenziyalar olish bo‘yicha kelishuvga erishgan.

north_east

Tramp Zelenskiyga nafrati tufayli Ukrainaga qat’iy shartlar qo‘ydi – “Times”

“Ayrim davlatlar bilan Ukrainaning razvedka ma’lumotlariga kirishini kengaytirish, yevropalik hamkasblarimiz ega bo‘lgan tegishli texnologiyalar va sun’iy yo‘ldoshlardan foydalanish bo‘yicha kelishuvga erishildi. Biz ba’zi rahbarlar bilan Ukrainaning o‘q-dorilar omboriga kirishi bo‘yicha kelishuvga erishdik. Biz havo hujumiga qarshi mudofaa tizimlarini ishlab chiqarish uchun litsenziyani kelishib oldik, shuningdek, artilleriyaning ayrim turlari uchun litsenziyalar ustida ishlaymiz”, dedi Zelenskiy. 

Yevropalik hamkorlar bilan muzokaralarni sharhlar ekan, siyosatchi “juda to‘g‘ri va aniq natijaga erishilganini” ta’kidladi. Zelenskiyning so‘zlariga ko‘ra, Ukraina uchun Fransiya tomonidan e’lon qilingan 2 milliard yevrolik yangi mudofaa paketidan tashqari, barcha yetakchilar bilan Ukrainaga muhim qo‘shimcha mudofaa yordam paketlari bo‘yicha kelishuvga erishilgan. Ukraina rahbari bu masala bo‘yicha aprel oyida bo‘lib o‘tadigan navbatdagi uchrashuvda ma’lum qiladi.

Eslatib o‘tamiz, 27 mart kuni “Financial Times” gazetasi va “Bloomberg” agentligi 23 mart kuni Kiyev tomonidan qabul qilingan AQSH va Ukraina o‘rtasidagi foydali qazilmalar bo‘yicha yangi kelishuv loyihasi Vashingtondan Ukrainaning mineral resurslari va energetika aktivlari ustidan nazoratni o‘rnatish bo‘yicha ancha tajovuzkor talablarni o‘z ichiga olishini xabar qilgandi. Biroq  hujjatda hech qanday xavfsizlik kafolatlari mavjud emas.