Tramp Zelenskiyga juda katta muammolar bilan tahdid qildi (video)

AQSH Prezidenti Donald Tramp Ukraina Prezidenti Vladimir Zelenskiyni Vashington va Kiyev o‘rtasidagi foydali qazilmalar bo‘yicha kelishuvdan chiqish niyatidalikda aybladi. Bu haqda u kecha, 30 mart kuni Air Force One bortida jurnalistlar bilan uchrashuvda ma’lum qildi.

“U noyob yer metallari bo‘yicha kelishuvdan chiqishga harakat qilmoqda va agar shunday bo‘lsa, u muammoga duch keladi, katta muammolarga duch keladi”, dedi Tarmp.

Tramp, shuningdek, Zelenskiy “NATO a’zosi bo‘lishni xohlashini, lekin u hech qachon NATOga a’zo bo‘lmasligini, buni tushunib turishini” qo‘shimcha qildi.

Bir kun avval “Bloomberg” agentligi Ukraina Donald Tramp taklif qilgan iqtisodiy kelishuvga Amerika sarmoyasini ko‘paytirish majburiyatini kiritish uchun o‘zgartirish kiritishni so‘rashi haqida xabar berdi. “Bloomberg”ning qayd etishicha, taklif loyihasi Vashingtonga Ukrainadagi barcha yirik infratuzilma va mineral investitsiyalar ustidan hech qanday muddatsiz nazoratni beradi. Kiyev esa kelishuv shartlari mamlakatning Yevropa Ittifoqiga kirish jarayoniga putur yetkazishi va urush boshlanganidan beri AQSH tomonidan ko‘rsatilgan barcha harbiy va iqtisodiy yordamni qaytarishni talab qilishi mumkinligidan xavotirda.

north_east

Ukraina AQSHdan resurs bo‘yicha yangi shartnoma loyihasini oldi – Zelenskiy

“Agar hamkorlik to‘g‘risidagi bitim qabul qilinsa, Qo‘shma Shtatlar Ukraina iqtisodiyotining muhim qismiga, jumladan, tog‘-kon sanoati, neft va gaz, muhim foydali qazilmalar, shuningdek, portlar, avtomobil va temiryo‘llarga ta’sir etuvchi sarmoyaviy qarorlar ustidan samarali nazoratga ega bo‘ladi”, deb yozadi agentlik.

Qayd etilishicha, Ukraina rasmiylari amerikalik hamkasblari bilan suhbat chog‘ida taklif etilayotgan hujjat yuzasidan o‘z xavotirlarini bildirgan. Qo‘shma Shtatlar vakillari esa, ayniqsa, Ukrainaning Yevropa Ittifoqiga kirishi mumkinligi nuqtai nazaridan ularga e’tiroz bildirmagan.

“Bu Vashington o‘zgarishlarni muhokama qilish uchun ochiq bo‘lishi mumkinligidan dalolat beradi”, deya nomi oshkor etilmagan manbaning pozitsiyasini xabar qildi “Bloomberg”.

Eslatib o‘tamiz, 27 mart kuni “Financial Times” gazetasi va “Bloomberg” agentligi 23 mart kuni Kiyev tomonidan qabul qilingan AQSH va Ukraina o‘rtasidagi foydali qazilmalar bo‘yicha yangi kelishuv loyihasi Vashingtondan Ukrainaning mineral resurslari va energetika aktivlari ustidan nazoratni o‘rnatish bo‘yicha ancha tajovuzkor talablarni o‘z ichiga olishini xabar qilgandi. Biroq  hujjatda hech qanday xavfsizlik kafolatlari mavjud emas.