АҚШ билан келишувда НАТО масаласи йўқ – Зеленский

Украина ва АҚШ ерости бойликлари бўйича келишув лойиҳаси устида ишламоқда. Ҳужжатда Украинанинг НАТОга аъзолиги масаласи кўтарилмаган. Бу ҳақда Украина Президенти Владимир Зеленский журналистлар билан суҳбат чоғида маълум қилди.

Унинг қайд этишича, айни дамда асосан америкалик ва украиналик ҳуқуқшунослар келишув устида ишламоқда.

Шу билан бирга, давлат раҳбари Трампнинг Украина гўёки АҚШ билан НАТО аъзолиги бўйича келишув имзоламоқчи экани ҳақидаги сўнгги баёнотига жавоб қайтарди.

“Ушбу келишув ва НАТО масаласига келсак, бу келишувда ундай гап йўқ ва бўлмаган ҳам”, дея таъкидлади Президент.

Ерости бойликлари бўйича келишув ҳали муҳокаманинг дастлабки босқичида, чунки АҚШ яқинда Украинага ҳужжатнинг тўлиқ версиясини таклиф қилди. Дастлаб томонлар рамка битимини имзолашни ва шундан кейингина тўлиқ ҳуқуқли келишувга ўтишни режалаштирган.

Эслатиб ўтамиз, аввалроқ АҚШ Президенти Дональд Трамп Зеленскийнинг “НАТО аъзолиги ёки шунга ўхшаш нарса” учун АҚШ билан келишувга эришиш нияти ҳақида “журналистлардан эшитганини” айтганди.