Abxaziya vitse-prezidenti rahbarlik vazifasini bajara boshladi

Tan olinmagan Abxaziya vitse-prezidenti Badra Zurabovich Gunba Aslan Bjaniya iste’foga chiqqanidan so‘ng davlat rahbari vazifasini o‘z zimmasiga oldi. Bu haqda respublika prezidenti matbuot xizmati xabar berdi.

“Men Abxaziya respublikasi prezidentining vakolatlari va vazifalarini bajarishni boshladim”, degan Gunba o‘zining Telegram-kanalida joylagan videomurojaatida.

Shuningdek, u barcha rahbar va davlat organlariga o‘z vazifalarini respublika qonunchiligida belgilangan tartibda bajarish bo‘yicha topshiriqlar bergan.

Ma’lumot uchun, Abxaziyada norozilik namoyishlari bir hafta oldin Rossiya bilan tuzilgan investitsiya bitimidan norozilik tufayli boshlangan. Namoyishchilarga ko‘ra, ular Rossiya bilan munosabatlarga qarshi emas, ammo rossiyalik oligarxlarning harakatlaridan va Bjaniyaning kelishuvni “o‘z manfaati yo‘lida ishlatishidan” xavotirda.

Namoyishlar davomida bir qancha muxolifat vakillarining hibsga olinishiga javoban norozilik bildiruvchilar hukumat binolari majmuasini, shu jumladan Xalq majlisi binosini egallab olgan va “prezident”ning iste’fosini talab qilgan edi. Bjaniya esa kelgusi saylovlarda ishtirok etishini va ko‘pmillatli Abxaziya xalqi o‘z yetakchisini kim deb tanlashini bilib olishni va’da qilgan.

Eslatib o‘tamiz, avvalroq Aslan Bjaniya iste’foga chiqish haqida ariza bergan edi. Sal o‘tib tan olinmagan Abxaziya Xalq majlisi (parlamenti) mamlakat “prezident”i Aslan Bjaniya iste’fosini qabul qildi.