Abdusattorov xalqaro musobaqada g‘olib bo‘ldi
Sport
−
25 may 2023 7486
O‘zbekistonlik grossmeyster Nodirbek Abdusattorov “ChessKid” onlayn turnirida g‘oliblikni qo‘lga kiritdi.
Musobaqaning finalida Abdusattorov niderlandiyalik Yorden van Forestga qarshi dona surdi. Bahs 2,5:1,5 hisobida o‘zbekistonlik shaxmatchining foydasiga hal bo‘ldi. Grossmeysterlar o‘rtasidagi 4 ta partiyaning 3 tasida durang qayd etildi. 3-partiyada Nodirbek qora donalarda raqibidan ustun keldi.
Abdusattorovning Yorden van Forest bilan yo‘llari oldin ham ko‘p kesishgan. “Tata Steel Chess-2023” xalqaro turnirida ham ikki shaxmatchi o‘zaro kuch sinashgan va bahsda niderlandiyalik shaxmatchining qo‘li baland kelgandi.
Eslatib o‘tamiz, oxirgi marta Abdusattorov onlayn tarzda o‘tkazilgan “Chessable Masters” xalqaro turnirining 2-divizionida g‘olib bo‘lgandi. Nodirbek shu yilning mart oyida Toshkent shahrida o‘tkazilgan “Rustam Qosimjonov xalqaro turniri”da ishtirok etib, 5-o‘rin bilan kifoyalangandi.
