HAMAS va Isroilga hal qiluvchi sulh loyihasi topshirildi

Bugun, 13 yanvar kuni muzokarachi tomonlar Isroil va HAMASga sulh va asirlarni ozod qilish bo‘yicha yakuniy loyihani taqdim etdi. Bu haqda “Reuters” xabar berdi.

Qayd etilishicha, muzokaralarda AQSH Prezidenti Jo Bayden va saylangan prezident Donald Trampning vakillari, shuningdek, Qatar rasmiylari ishtirok etgan. Trampning kelasi prezidentlik davrida AQSH vakili bo‘lib xizmat qiladigan Stiv Vitkoff Isroilning eng yuqori razvedka rasmiylari bilan birgalikda ushbu loyihani qabul qilgan.

Agentlik manbasining aytishicha, Qatar vakili tomonlarga o‘t ochishni to‘xtatish va garovga olinganlarni ozod qilish bo‘yicha kelishuv matnini topshirgan.

Loyiha sulh va asirlarni ozod qilishni o‘z ichiga oladi. Hozirgi paytda bu yakuniy kelishuv emas, ammo rasmiylar keyingi 24 soatni kelishuvni yakunlashda “hal qiluvchi soatlar” deb hisoblamoqda. Ikkala tomon ham janglarni to‘xtatish va asirlarni ozod qilish tamoyillari bo‘yicha kelishgan, lekin HAMASning doimiy tinchligi va Isroil tomoni HAMASga qarshi janglar boshlab qolishi hali ham shubha ostida qolmoqda.

AQSH, Qatar va Misr bu kelishuv ustida bir yildan ortiq vaqt davomida ishlab kelmoqda. 20 yanvarda Trampning prezidentlikka kirishi ushbu kelishuvni amalga oshirish uchun oxirgi muddat sifatida ko‘rilmoqda.

Eslatib o‘tamiz, avvalroq HAMAS Isroil bilan G‘azo sektori bo‘yicha sulhga erishish ehtimoli haqida bayonot berib, buning amalga oshishini “har qachongidan yaqinroq” degan edi. Biroq Isroil Prezidenti Isxak Gersog muzokaralarda sulh bitimiga erishish ehtimoli ortib borayotgani haqidagi xabarlarga qaramay, hali muhim burilish ro‘y bermaganini ma’lum qilgandi. Bildirilishicha, Isroil delegatsiyasi Qatarda HAMASning bitim tafsilotlariga javobini kutmoqda, lekin ijobiy javob olish ehtimoli kam. Shundan so‘ng, Falastinning HAMAS harakati ham G‘azo sektorida o‘t ochishni to‘xtatish rejimini joriy etish bo‘yicha kelishuvning birinchi bosqichi doirasida Isroil tomonidan taqdim etilgan ro‘yxatdagi 34 nafar garovdagilarni ozod qilishga rozi bo‘lgandi.