Жанубий Кореянинг собиқ президенти умрбод озодликдан маҳрум этилди

Жанубий Кореяда суд собиқ президент Юн Сок Ёлни 2024 йил охирида киритилган ҳарбий ҳолат билан боғлиқ қўзғолон уюштиришда айбдор деб топди ва унга умрбод қамоқ жазоси тайинланди. Бу ҳақда “Yonhap” хабар берди.

Юн Сок Ёль парламент спикерини ҳамда ўша пайтдаги ҳукмрон партия ва асосий мухолифат партияси раҳбарларини ҳибсга олишни ташкил этганликда айбланган.

Айблов хулосасига кўра, Юн собиқ мудофаа вазири Ким Ён Хён ва бошқа амалдорлар билан исённи ташкил этиш учун тил бириктирган ва мамлакатда уруш ёки шу каби фавқулодда ҳолат мавжуд бўлмаганига қарамай, ноқонуний равишда ҳарбий ҳолат эълон қилган.

Махсус прокурорлар жамоаси собиқ президент учун ўлим жазосини сўраган. Жанубий Кореяда эса бу жазо чораси 1997 йилдан бери амалий қўлланмаган.

Шунингдек, Кореянинг собиқ мудофаа вазири Ким Ён Хён ҳам қўзғолон иши бўйича айбдор деб топилган. У ҳарбий ҳолат эълон қилинганидан кейин юзага келган вазият учун жавобгар эканини билдирган ва унга 30 йил қамоқ жазоси берилган.

Маълумот учун, Юн Сок Ёль Жанубий Кореяда қамоқда сақланган ҳолда айблов эълон қилинган илк амалдаги президент бўлди. У собиқ мудофаа вазири ва бошқа шахслар билан тил бириктириб, конституциявий тузумни издан чиқариш мақсадида исён уюштиришда айбланмоқда.

2024 йилнинг 3 декабрь куни Юн Сок Ёль фавқулодда мурожаат билан чиқиб, мамлакатда ҳарбий ҳолат жорий этилганини эълон қилган. У бу қарорни “Шимолий Кореяга мойил, давлатга қарши кучларга қарши туриш зарурати” билан изоҳлаган. Консерваторлар бу атама билан Шимолий Корея билан мулоқотни қўллаб-қувватловчи «Тобуро» мухолифат партиясини назарда тутади. Кейинчалик Миллий Ассамблея бу қарорни бекор қилиб, Юнни лавозимидан четлатган.

Эслатиб ўтамиз, аввалроқ Сеулнинг Марказий туман суди Жанубий Корея собиқ президенти Юн Сок Ёлни 2024 йил декабрида жорий қилган ҳарбий ҳолат билан боғлиқ айбловлар бўйича беш йилга қамоқ жазосига ҳукм қилганди.