Зеленскийда фақат битта йўл бор – Трамп

Украина Президенти Владимир Зеленский АҚШнинг Россия билан можаро бўйича тинчлик режасини тасдиқлашга мажбур ва унинг бошқа йўли ҳам йўқ. Бу ҳақда кеча, 21 ноябрь куни АҚШ Президенти Дональд Трамп Оқ уйнинг Овал кабинетида журналистлар билан бўлиб ўтган суҳбатда сўз очди. 

“Бизда тинчликка эришиш йўли бор деб ўйлаймиз. Зеленский уни тасдиқлаши керак бўлади”, деган Оқ уй раҳбари. 

Шунингдек, Трамп Зеленскийга унинг қўлида ҳеч қандай карталар йўқлигини эслатган. Трампнинг сўзларига кўра, АҚШ томони кўплаб инсонлар ҳаётини сақлашга ҳаракат қилмоқда.

“Зеленский режани тасдиқлаши керак, тасдиқламаса, унда биласизми, улар фақат урушни давом эттираверишади деб ўйлайман”, дея қўшимча қилган Трамп. 

Трампнинг айтишича, Зеленский режани тасдиқламаса, АҚШ қўллаб-қувватлашни тўхтатиши мумкин. Шу сабабли, Украина тезроқ қарор қабул қилиши керак, чунки “қиш жуда совуқ бўлади”. Трамп аввал 27 ноябрни тинчлик режасини қабул қилиш учун сўнгги муддат сифатида белгилаган.

Украина Олий Рада депутати Алексей Гончаренко режа матнини эълон қилган, кейинчалик Оқ уй унинг ҳақиқийлигини тасдиқлаган. Режа 28 пунктдан иборат:

• Қрим, Луганск ва Донецк де-факто (Украина ҳудуди бўлишига қарамай, амалда Россия назорати остида) сифатида тан олинади;
• Ҳерсон ва Запорожье ҳудудлари ҳозирги вазият бўйича “музлатилади”;
• Украина НАТОга қўшилмайди;
• мамлакатда 100 кун ичида сайловлар ўтказилади, эвазига хавфсизлик кафолатлари берилади;
• Россия глобал иқтисодиётга қайта интеграция қилинади;
• санкциялар босқичма-босқич ва индивидуал равишда муҳокама қилинади.

Зеленский режа асосида оғир танловлар олдида қолганини таъкидлаган. Кейинчалик у АҚШ билан ҳамкорликда режа устида ишлаш зарурлигини айтган. 

“Киев, АҚШ ва Европа билан маслаҳатлашиб, тинчликка етиш йўлини ҳақиқатдан ишлайдиган қиламиз”, дея ишонч билдирган Зеленский. 

ОАВ маълумотига кўра, агар Украина режа бўйича келишувни 27 ноябргача имзоламаса, АҚШ қурол ва разведка ёрдамини тўхтатиш билан таҳдид қилмоқда. Кейин ҳужжат Москвага келишув учун юборилади, АҚШ декабрь бошигача келишувни якунламоқчи. CNN хабарига кўра, Оқ уй йил охиригача битимга эришишни мақсад қилган.

Эслатиб ўтамиз, аввалроқ Россия Президенти Владимир Путин Дональд Трампнинг Украина урушини тинч йўл билан ҳал қилиш бўйича режаси Россия билан батафсил муҳокама қилинмагани, аммо у можарони ҳал қилиш учун асос бўлиши мумкинлигини айтганди.