Зеленский Путинга таҳдид қилди

Украина Президенти Владимир Зеленский Россия-Украина урушида ҳал қилувчи босқич энди ҳаво майдонида кечаётганини айтиб, Россия Президенти Владимир Путинга таҳдид қилди. Бу ҳақда у “Financial Times” нашрига берган интервьюсида сўз очди.

Зеленскийга кўра, Украина фронтдаги позицияларини сақлаб қолмоқда, шунингдек, Россиянинг денгиздаги имкониятларини чеклашга эришган.

“Бу қарама-қаршиликда энди қайси томоннинг ҳудуди каттароқ эканига боғлиқ эмас. Биз ҳаво маконига ўтдик ва ҳавода рақобатбардошмиз”, деган у.

Шунингдек, Зеленский Украинанинг энг катта заиф нуқтаси ҳаво ҳужумидан мудофаа тизими эканини тан олган. Шунга қарамай, унинг таъкидлашича, мамлакат урушда ғалаба қозониш имкониятини сақлаб қолмоқда.

У Москва ва Санкт-Петербургга уюштирилаётган кенг кўламли дрон ҳужумларининг психологик таъсири ҳамда Россиядаги иқтисодий муаммолар охир-оқибат Владимир Путиннинг урушни давом эттириш борасидаги қарорини заифлаштиришини айтган.

“Москвага юзта эмас, мингта дрон учиб борганда, у тушунади. Буни шахсан ҳис қилганда ва ўз кўзи билан кўрганда, маслаҳатчилари уни Урал ортига кўчиб ўтишга кўндира бошлайди. Путин Москвадан қанчалик узоқлашса, уруш якуни шунчалик яқинлашади”, деган Зеленский.

Эслатиб ўтамиз, аввалроқ Владимир Зеленский Россиянинг сўнгги оммавий ҳаво ҳужумидан сўнг Patriot ҳаво мудофаа тизимлари учун ракеталар танқислиги сабаб Россиянинг баллистик ракеталарини уриб тушириш қийинлашганини маълум қилган эди.