Зеленский Германияга борди

Бугун, 13 февраль куни Украина Президенти Владимир Зеленский Мюнхен хавфсизлик конференциясида қатнашиш учун Германияга етиб борди. Бу ҳақда у ўзининг Telegram каналида маълум қилди. 

Президентнинг билдиришича, ташриф давомида у ҳамкор давлатлар раҳбарлари билан икки томонлама ва кўп томонлама учрашувлар ўтказади. Учрашувларда Украина ва Европа хавфсизлигига оид масалалар, шунингдек, келгусидаги ҳамкорлик йўналишлари муҳокама қилинади.

Зеленский кун тартибидан учувчисиз учиш аппаратларини ишлаб чиқариш бўйича биринчи Украина–Германия қўшма корхонасини ишга тушириш масаласи ҳам ўрин олганини билдирган. Унинг сўзларига кўра, қўшма ишлаб чиқаришни кенгайтириш ва Европа хавфсизлик тизимидаги ҳамкорликни мустаҳкамлаш муҳим аҳамиятга эга.

Президент урушни тинчлик билан якунлаш ва Украина ҳамда бутун Европа учун ишончли хавфсизлик кафолатларини яратиш асосий мақсад эканини қайд этган. Шунингдек, Зеленский Украина билан ҳамкорлик қилаётган давлатларга кўрсатилаётган ёрдам учун миннатдорчилик билдирган.

Эслатиб ўтамиз, аввалроқ Украина Президенти Владимир Зеленский Россия Президенти Владимир Путин билан Москвада учрашув ўтказишнинг имконсизлигини айтиб, уни Киевга таклиф қилганди.

Жамшидбек Амиров