Венгрия Украинани нефть қувурига ҳужум қилишда айблади

Венгрия Ташқи ишлар вазири Петер Сийярто Украинани нефть қувурига ҳужум қилганликда айблади ва бу ҳодиса Россиядан мамлакатга нефть етказиб беришни вақтинча тўхтатиб қўйганини билдирди. Бу ҳақда у ўзининг Х саҳифасда ёзиб қолдирди.

“Бу бизнинг энергетик хавфсизлигимизга навбатдаги зарба бўлиб, ғазаблантирувчи ва қабул қилиб бўлмайдиган ҳолатдир!” дея ёзган у. 

Вазир ҳужум айнан қачон ва қаерда содир бўлганини очиқламаган.

У Россия Энергетика вазири ўринбосари Павел Сорокиннинг сўзларига таянган ҳолда, мутахассислар ҳозирда қувур ишлаши учун зарур бўлган трансформатор станциясини тезроқ тиклаш устида ишлаётгани, бироқ етказиб бериш қачон қайта йўлга қўйилиши номаълумлигини қўшимча қилган. 

Россиядан Венгрияга нефть “Дружба” қувурининг жанубий тармоғи орқали етказиб берилади. Шимолий тармоқ бўйлаб (Польша ва Германияга) Россия хом нефтининг оқими Европа Иттифоқи санкциялари сабаб тўхтатилган, аммо шу йўналиш орқали Европага Қозоғистон нефти юборилади.

Сийярто олдинроқ ҳам Украина Брянск вилоятидаги “Дружба” қувурига тегишли объектга зарба берганини айтганди. 

Россия ҳукуматининг маълумотига кўра, 2024 йилда “Дружба” қувурининг жанубий тармоғи орқали Венгрияга 4,78 миллион тонна нефть етказилган. 2025 йилнинг январь-февраль ойларида эса 956 минг тонна нефть юборилган. Ҳукумат Будапештни энергия ресурсларини импорт қилишда муҳим ҳамкор сифатида таърифлаган.

Эслатиб ўтамиз, аввалроқ Венгрия Бош вазири Виктор Орбан Украинанинг НАТОга аъзо бўлиши Россия билан қуролли тўқнашувга ва эртаси куни Учинчи жаҳон урушига олиб келишини айтганди.