“Узилган бош”, қуйма олтинлар ва бир дунё қурол-яроғ. Пригожиннинг уйидан яна нималар топилди? (фоторепортаж)

Жорий йилнинг 24 июнь куни “Вагнер” раҳбари Евгений Пригожин ҳарбий исён кўтарган эди. Ўшанда унинг уйида тинтув ўтказилиб, катта миқдордаги пуллар ва бошқа буюмлар мусодара қилинганди. Бугун, 6 июль куни бир қатор оммавий ахборот воситаларида Пригожиннинг уйидан тинтув вақтида олинган тасвирлар пайдо бўлди.

“Фонтанка” нашри томонидан эълон қилинган суратларда Пригожиннинг уйидан топилган бир қатор буюмлар, жумладан, кўплаб орден ва медаллар тақиб қўйилган кийим, муҳим учрашувлар пайтида эшикка тираб қўйиладиган улкан босқон (кувалда) кабиларни кўриш мумкин. 

Яна бир эътиборни тортувчи буюм деворга осиб қўйилган боши узилган террорчи жасадининг тасвири ҳисобланади. Тахминларга кўра, мазкур сурат Сурияда олинган.

Шунингдек, “Фонтанка” эълон қилган суратлар орасида Пригожинга исёндан роппа-роса бир йил аввал – 2022 йилнинг 20 июнида берилган Россия Федерацияси қаҳрамони унвони сертификати ҳам бор.

Бундан ташқари, Пригожиннинг уйидан COVID пандемияси вақтидан сақланиб қолган, тўлиқ жиҳозланган тиббиёт хонаси ҳам топилган. Бу ердаги қурилмалар реанимация ва интенсив терапия бўлимларида фойдаланилади.

“Фонтанка”дан ташқари “Известия” нашри ҳам бир қанча суратларни эълон қилди. Фотолар орасида унинг уйидан топилган кўплаб қурол-яроғлар, париклар, кўпгина сохта ҳужжатлар, бир нечта олтин қуймалари ва катта миқдордаги пуллар эътиборга молик.

Шунингдек, унинг хонадонидан фитнес зали ва ибодат учун махсус хона ҳам ўрин олган.

Кремлга алоқадорлиги тахмин қилинадиган аноним Telegram-канал “Осторожно, новости”да эса “Вагнер” раҳбарининг турли образлардаги суратлари пайдо бўлди. Уларда Пригожин Судандаги Мудофаа вазирлиги ходими, абу-дабилик дипломат ёрдамчиси, Бенғозидан келган катта лейтенант кўринишларида гавдаланади.

Эслатиб ўтамиз, аввалроқ тинтув вақтида мусодара қилинган 10 миллиард рубль пуллар ва бошқа буюмлар Пригожинга қайтариб берилганди.