Ўзбекистон яна икки давлат билан ЖСТга аъзо бўлиш бўйича музокараларни якунлади

Ўзбекистон Жаҳон савдо ташкилотига аъзо бўлиш бўйича Покистон ва Таиланд билан икки томонлама музокараларни якунлади. Бу ҳақда Покистоннинг ЖСТдаги доимий вакили Али Сарфраз Ҳусайн ва Таиланднинг ЖСТдаги вакили Пимчанок Питфилд LinkedIn`даги саҳифасида маълум қилди.

“Ушбу протокол бозорга кириш бўйича музокараларни якунлаш тўғрисида қардош мамлакатни Жаҳон савдо ташкилотига аъзоликка янада яқинлаштиради”, деб ёзди Али Сарфраз Ҳусайн.

Таиланд вакили ҳам Ўзбекистоннинг ташкилотга аъзо бўлиши тўғрисидаги протоколни имзолаганини маълум қилди.

“Биз Ўзбекистоннинг кўп томонлама савдо тизимига тезроқ қўшилишини интиқлик билан кутяпмиз ва ишонамизки, ЖСТ оиласига аъзолик Ўзбекистонга кўпроқ савдо ва инвестициялар олиб келади. Икки томонлама даражада бу мавжуд савдо алоқаларини мустаҳкамлаш ва келажакда халқлар ўртасидаги ҳамкорликни янада ривожлантиришга интилишимизнинг тасдиғидир”, деди Пимчанок Питфилд.

Маълумот учун, сўнгги икки ойда Ўзбекистон Сальвадор, АҚШ, Хитой ва Филиппин билан шу бўйича музокараларни якунлаган.