Ўзбекистон элчиси Финляндия Презиндентига ишонч ёрлиғини топширди

Бугун, 4 апрель куни Ўзбекистоннинг Финляндияга янги тайинланган элчиси Темур Раҳмонов томонидан топширилган ишонч ёрлиқларини мамлакат Президенти Александр Стубб қабул қилиб олди. Бу ҳақда “Дунё” ахборот агентлиги хабар берди.

Билдирилишича, расмий тадбирдан кейин ўтказилган мулоқот пайтида Ўзбекистон билан Финляндия ўртасидаги икки томонлама ҳамкорликнинг ҳозирги ҳолати ва унинг келажакдаги истиқболлари муҳокама қилинди.

Президент Александр Стубб Ўзбекистон Президенти Шавкат Мирзиёев бошчилигида мамлакатда олиб борилаётган кенг кўламли ислоҳотларни фин халқи тўлиқ қўллаб-қувватлашини ва бу йўналишда икки томонлама алоқаларни янада кенгайтиришга тайёрлигини билдирган. Шунингдек, Финляндия раҳбари расмий Хелсинки ва Тошкент ўртасидаги сиёсий мулоқот ҳамда икки томонлама савдо-иқтисодий алоқаларнинг ривожланиб бораётганини юқори баҳолаб, Ўзбекистоннинг минтақадаги муҳим ўрнини қайд этиб ўтган.

Маълумот учун, Темур Раҳмонов рус, инглиз, поляк ва испан тилларини мукаммал билади. У Жаҳон иқтисодиёти ва дипломатия университетини тамомлаган. ТИВ тизимидаги фаолиятини 1999 йилда бошлаган. Ўтган йиллар давомида у вазирлик марказий аппаратида, шунингдек, Ўзбекистоннинг Польша, Италия ва Испаниядаги элчихоналарида турли лавозимларда ишлаган. 2017–2018 йилларда эса Ташқи ишлар вазирлигининг Урганч шаҳри ҳудудий бошқармаси бошлиғи, Хоразм вилояти ҳокимининг инвестициялар, инновациялар, хусусийлаштирилган корхоналарга кўмаклашиш, эркин иқтисодий ва кичик саноат зоналарини ривожлантириш масалалари бўйича ўринбосари сифатида фаолият олиб борган.

Эслатиб ўтамиз, ўтган ойда Ўзбекистоннинг Словакиядаги биринчи Фавқулодда ва мухтор элчиси (қароргоҳи Вена шаҳрида жойлашган) Бахтиёр Ибрагимов ушбу мамлакат Президенти Петер Пеллегринига ишонч ёрлиғини топширганди.

Сара Комилжонова