“Уйда ёлғиз” фильми юлдузи 80 ёшида вафот этди

Британиялик машҳур актёр ва қўшиқчи Тим Карри 80 ёшида Лос-Анжелесдаги уйида вафот этди. Бу ҳақда кеча, 26 август куни унинг менежери маълум қилди.

Қайд этилишича, Карри Лос-Анжелесдаги уйида жорий йилнинг 25 август куни вафот этган. Ўлим сабаби ҳозирча маълум қилинмаган. Актёр сўнгги йилларда соғлиғи билан боғлиқ муаммоларга дуч келган.

Маълумотларга кўра, Карри кино тарихида, аввало, 1975 йилда экранларга чиққан культ фильм “Рокки Хоррорнинг даҳшатли шоуси”даги доктор Френк Н. Фуртер образи билан машҳур бўлган. Мазкур роль актёрнинг энг таниқли образига айланган.

У шунингдек, “Уйда ёлғиз 2: Нью-Йоркда йўқолиш”, “Уч мушкетёр”, “Далил”, “Афсона”, “Маппетлар: Хазиналар ороли”, “Соя” ва “Чарлининг фаришталари” каби фильмларда роль ижро этган.

Актёр саҳнада ҳам катта муваффақиятларга эришган. У “Амадей”, “Менинг севимли йилим” ва “Монти Пайтоннинг Спамалоти” спектаклларидаги роллари учун уч марта “Тони” мукофотига номзод бўлган. Шунингдек, анимацион лойиҳалардаги овозли роллари билан ҳам танилган ва 1991 йилда “Питер Пен ва қароқчилар” мультсериалидаги иши учун кундузги “Эмми” мукофотини (Daytime Emmy Award) қўлга киритган.

Карри 2013 йилда инсультни бошдан кечирган. Шундан сўнг ногиронлар аравачасидан фойдаланган ва ижодий фаолиятини анча қисқартирган. Шунга қарамай, у актёрликни бутунлай тарк этмаган. 2024 йилда “Stream” қўрқинчли фильмида катта экранга яна қайтган.

Маълумот учун, Тим Карри 1946 йил 19 апрелда Англиянинг Чешир графлигидаги Граппенхолл қишлоғида туғилган. У Бирмингем университетида драма йўналишида таҳсил олган.

Актёр турмуш қурмаган ва фарзандлари бўлмаган. У актёрликдан ташқари қўшиқчи ва бастакор сифатида ҳам фаолият юритган, ўз рок гуруҳида ижро этган ҳамда бир нечта альбом чиқарган.

Эслатиб ўтамиз, аввалроқ “Уйда ёлғиз 2: Нью-Йоркда йўқолиш” фильмида рўл ижро этган ирландиялик актриса Бренда Фрикер 81 ёшида вафот этгани ҳақида хабар берилган эди.